جريمة عشق

 
نورهان (قاعدة على الفرش في بيت صاحبتها علياء ..حاطة ساق ع الساق وتستنى فاها مشات للكوجينة تجيلها في كاس "jus"
هي اكاكا ودخل علاها علي (عريان حاطط كان منشفة اكهو،،مازال كي خرج من الدوش ينكت)هي راتو وهي صاحت هو تفجع خرج يجري ومفهم شي ياخي دخل لدار اخرى ولا بيت اخرى ولا فين دخل بالضبط؟ستنى ساعة لا مهوش غالط بيت علياء هاذي وبالامارة بجنب بيتو شكون هاذي الي راتو ولات تصيح؟
هو اكاكا دايخ ويسال وجاوب وحدو جات علياء تلقاه واقف قدام بيتها هو راها وهو حب ياخذ من يدها الكاس
علياء (بعدت يدها الي فاها الكاس):ماهوش ليك هذا للطفلة،،برا اوكا الكوجينة صب
علي(فكلها الكاس من يدها وشرب):انا شتهيت نشرب مل الكاس هذا دبر في
"en plus"
صاحبتك هاذي الي لداخل لازمها طيزانة مش "jus" فماشي ما اعصابها تريض،،يا معلم هي راتني وهي ولات تصيح ،،داعش انا؟؟
علياء (ماتت بالضحك):متقوليش دخلتلها وانت هكا؟؟؟
علي (يغزر لروحو شلابس):اي شفاها؟؟
علياء (تضحك وادز فيه بش دخلتو لبيتو):ادخل ادخل بدل حوايجك وبعد تو نقلك شفاها مالا مهبول هذا باهي برشا كي ما سخطتكش بحاجة البنية متحجبة وهو داخللها عريان
علي:فين ترا فيه الحجاب؟ بالامارة سمراء وشعرها اكحل وطويل وارطب
علياء (تضحك):يقوى عليك ربي سكانيتها الطفلة في لحظة؟؟
علي (يضحك):لا والله ما شفت شي كان شعرها اكهو
علياء(تضحك):لا كان حبيت زادة راك زدت شفت هيا فيسع ادخل بدل خنمشي نجيبلها كاس اخر كي قدر علي ربي
علي:وزيدني كاس في يدك
علياء:باهي
علي (غمزها):وابعثهولي معاها
علياء (تضحك):تو تعيا وانت تقبض (سكرت الباب)
مشات علياء للكوجينة صبت 2 كيسان واحد لصاحبتها وواحد لولد خالتها علي
دخلتلو للبيت تلقاه ما بدلش حوايجو مازال بكا المنشفة اذيكا حطتلو الكاس وجات بش تخرج جبدها من يدها وهبطتها فوقو وبدا ابوس فاها بكل شهوة كان يتنفس بزربة ونفس متاعو زاد ذوبها ودخلها بعضها وريحة الجال دوش متاعو ضربتلها في خشمها خلاتلها قلبها يضرب في 200 عيناها مغمضة وهي في عالم اخر
دخل يدو تحت مريولها وبدا بش احللها قتلو وهي تحاول تسيطر على روحها ؛امان علي مبعد عيش حبي الطفلة حذايا امان
علي (باقي ابوس فاها ويلعبلها ب... متاعها):ربع ساعة في يدك بركا تصرفها وتجيني (ابوس فاها من رقبتها ازيد اولع فاها)ن.. امك تفوت 12 وربع معادش تلقاني
علياء (مازالت فوقو):علاش فين ماشي؟
علي(باقي ابوس فاها بش ما يجاوبهاش)
علياء:امان علي راك وعدتني!!ملكك انا ومسلمتلك في كل شي مهم ما تزيدش تحرقلي قلبي اكثر من هكا على متحبش تحس بي؟؟نموت راني كي نتخيلك مع اي طفلة(حطت راسها على كتفو وباستو)نحبك راني والله نحبك
علي (نزل علاها عنقها بالقوي وقلبها وجاء هو فوقها ونحا المنشفة متاعو ولصق فاها وما صيبها كان ما طفى نارو).........
لبست حوايجها وخرجت من بيتو ودخلت لبيتها وهي مبهظلة وحاشمة ربي تستر لا الطفلة سمعت ولا حست بحاجة جات بش تحل الباب تلقاه مسكر :نورهان حل علياء انا ما تخافش
نورهان (حلتلها الباب):شبيك لتوا ياخي؟؟ والله على مرتين كنت مروحة غير خفت لا اعاود يعرضني خوك
علياء (ميتة بالضحك):ديما اكاكا اذاكا ،،حكالي كيفاش ريتو وليت تصيح شخت عليك ضحك
نورهان:توا هذا شي اضحك؟؟والله شعرة لا مشيت فاها من الصدمة،،وزيد انت غريت بي قتلك راني منحيش الحجاب وانت شديتني نحي نحي ميدخلي حد هاك من جورتك خوك تكشف علي ،،في بالك نورمال مون ياخذي توا؟؟ (تفدلك)
علياء (تتسكك بالضحك):شكون ياخذك؟؟علي؟؟؟
نورهان:صار هو علي اذاكا؟؟
علياء:اي علولو اذاكا مالا شفيبالك؟؟
نورهان:وانا ماشي في بالي قيس خوك ،،ستنى ساعة كي هو اذاكا علي ولد خالك
علياء (قصت علاها):ولد خالتي مش ولد خالي
نورهان:تي اي الي هو،،كيفاش يدخلك لبيتك وهو لابس اكاكا؟؟تي هو حتى خوك ولا يجوز انو انت تشوف عورتو خلي عاد ولد خالتك
علياء (ميتة بالضحك):عورتو؟؟
نورهان:شو كي باقي تضحك،،نحكي بالجد راني كيفاش تجيه الجرأة يدخل لبيت بنية صبية ويكشف عورتو اكاكا قدامها
علياء (تتسكك بالضحك):شو كي مازالت تعاود فاها يكشف عورتو
نورهان:حتى انا مع شكون نحكي،،انتما عائلة خر طر بصراحة
علياء (تضحك):هاك عرفت،،هيا فيسع قوم البس خلي نبدل انا زادة هاو علي هو الي بش اشيعنا للليسي
نورهان(تفدلك):ومن وقتاش هو اشيعك؟؟ولا متقوليش تضرب في من اول نظرة وحب اشيعك على خاتري؟؟
علياء (تلبس في حوايجها وتضحك):شفت ماهو يا سيدي؟؟هاك طلعتها
نورهان:اي علاش لا؟؟ بش يلقى خير مني هو؟زين وعين وضخافة وبدن وحشمة وعقولية واخلاق عالية
علياء(ميتة بالضحك):وخاصة الثلاثة الاخرانين اذوكم ما يمشيوش معاه جملا،،علي لازمو وحدة قليلة تربية ورقعة ومهيش عاقلة حتى طرف،،دونك حظوظك مهيش وافرة بش تحظى بحبو يا صديقتي العزيزة
نورهان:مالا انت هي الغالطة يا صديقتي العزيزة الاخرى خاتر النوعية متاع علولو كيف ما قلت انت يصوحب ويخرج معلي قلت علاهم اما ما ياخذ كان الي كيفي انا هاذي حطها في مخك
علياء (تضحك):ولاهي انت كان تتلهى تاخذ الباك متاعك السنا خير ملي لاهيتلي بعلي شكون بش ياخذ ،،اذاكا على قد امي وامو ما شيحو ريقهم بش ياخذولو مرا ما حبش يعرس جملا لين قريب يفقدو منو الامل
نورهان:بالك بيه حاجة كي ميحبش اعرس؟؟
علياء:شمعناها بيه حاجة؟؟
نورهان:شنوا شمعناها؟؟معناها ميحبش النساء ولا مينجمش روحو كي اعرس
علياء (بدات تتنرفز):تقصد ماهوش راجل معناها؟؟؟
نورهان:ما قلتش انا اما واحد اكاكا تبارك الله عليه قطعة متاع زين وموش حابب اعرس اكيد فما حكاية ،،قداش عمرو هو
علياء (وجها تقلب وظاهرة منرفزة):عمرو 34 سنة وارتاح ما بيه شي راجل وسيد الرجال وكان اعرس بمرا غدوة ما احبلها من اول ليلة زادة تهنى واطمان
نورهان(تضحك):تحكي تقول عليك مرتو ولا صاحبتو يا بنتي الحاجات هاذي ما فيهاش بدن قوي ولا ضعيف اينجم يظهرلك بدن وتبارك الله عليه اما هو عاجز جنسيا ولى بارد ولى
علياء (قصت علاها وطلعتلها سايي):لا ولى لا ما ولاش مبيه شي هو مهوش مخمم في العرس توا اذاكا هاو والي تخمم فيه الكلو غالط وهي نخرجو توا خاتر يستنى فينا ومعادش بكري
خرجت علياء قبلها وخلطت علاها نورهان عرضتهم امها
عايدة(سلمت على نورهان بالبوس):فينك يا هرابة معادش تجي؟؟امك شنحاولها ؟؟ وماماتك؟
نورهان:لباس اعيشك تاتا عايدة اهوكم كي العادة امي ايكا كالعادة تخدم وتروح كان 10 ولا 11 متاع الليل وميما ساقها باقي تسطر علاها رغم الي العملية نجحتلها حسب ما قالو الطوبا
عايدة:لطف علاها،،انشاء الله لباس سلملي علاها بربي
نورهان:عيشك تاتا يبلغ
عايدة:عيش بنتي،(مدت كارطة بو 10 الاف لبنتها)علي اوكا يستنى فيك اللوطا في الكرهبة بش اوصلكم وانت كي تروح خوذ سندويتش ولا بيتزا ولا شتحب وعشاء بوك وقيس اوكا في الفريجيدار غير سخنلهم بركا
علياء:علاش فين ماشية انت؟
عايدة:شنوا فين ماشية؟ياخي نسيت؟ماني قتلك البارح راجل عمة علي توفى وانا لازم نمشي مع خالتك نعزيوهم
علياء:وعلي ماشي معاكم؟
عايدة:بطبيعة بش يمشي،،وزيد خالتك حاطتلو عينها على بنت صاحبة عمتو اكيد بش نلقاوها غادي انشاء الله ربي اسهل واكهو
علياء:تتفرج نورهان؟؟ماشين اعزيو ويحطو في عيناهم على طفلة!!ياخي هو ميحبش اعرس بالسيف تحبو تاخذولو ؟؟والله ماني فاهمتكم كيفاش تخمو صدقني
عايدة:بربي قللها يا نورهان،،بوهالية صاحبتك هاذي،،امو تحب تفرح بيه وتتهنى عليه وتشوف ولادو عيب هاذي؟؟تبارك الله راجل هو قريب بش يدخل في 40وهو مازال عازب؟؟
علياء:فين 40 امي؟؟حرام عليك 34 هو اكهو فيسع رديتوه 40؟؟
نورهان:حتى 34 كبير وقيت توا
عايدة:هاو الناس الي تفهم ،،اختي والله كحدها عليه اتحب تفرح بيه يا ديني وزيد هو الكعيبة الوحيدة مكسبها هو العمر يجري راهو
علياء:زايد الحديث توا ديجا هو توا راهو يستنى فينا اعملو شتحبو انت وتاتا حبيبة اما مدام هو ماهوش حابب حكاية فارغة الي تعملو فيه
نورهان (تفدلك):اوكا كان ما مشاتش الامور مع الطفلة الي ناوينلو علاها اليوم اوكا انا موجودة اما يصبر علي نعدي الباك وخليوهولي وتهناو عليه
عايدة (تضحك):واحنا بش نلقاو خير منك؟؟علاش لا الي فيه الخير ربي اسهل فيه
نورهان (تفدلك):مالا نهار ال"résultat " متاع الباك انشاء الله وكان نجحنا تجيو تخطبوني واوكا تولي الفرحة فرحتين
علياء (ادز فاها):اخرج قدامي اخرج ،،انت تفدلك وعايدة اذيكا كل شي اجد علاها شويا اخر وتصدقك وبالحق تولي الحكاية اخرج الطفل يستنى فينا كان تلهيت في الباك متاعك خير
نورهان (تضحك):تاتا عايدة اوكا كيف ما تفاهمنا
عايدة (تضحك):هنيني انت توا بركا اوكا منك ليه ثنية كاملة ،، اما نحبك في الليل تكلمني تقولي خبير باهي عاد،،علياء خلاها هي تقعد بجنبو انت اركب من تالي
علياء:اذاكا الي مازال حتى هو اخرج انت اخرج حسابك معايا مبعد

في العشية بعد ما كملو القراية
نورهان خلطت على علياء الي سبقتها وشدتها من يدها وقالتلها:زح لتوا مغشة مني؟؟من بكري وانا نطلب في السماح
علياء (منرفزة): اختاني امان معينيش بش نحكي جملا توا
نورهان (باستها):تي هيا عاد تعرفني منحملش غشك علي سامحني والله لا قصدي صدقني
علياء ساكتة
نورهان:زيد انت ياسر كبرتها راك الحكاية شفاها كان قعدت انا بجنبو؟؟
علياء: فاها انك استبلهتني وعملت روحك نسيت تليفونك في الدار وتبعثني انا نجيبهولك نرجع نلقاك في بقعتي لا وفوق هذا ماكش حاسة انك غالطة
نورهان (تضحك):امان ياخي ما استانستش بي؟؟اول مرة نعملك فازة هكا؟مانا طول عمرنا مرة انت تعداها علي ومرة انا نعداها عليك وزيد انا بصراحة عجبني الله غالب وكي انت محبيتش تعطيهالي البلاصة برضاك هاني خذيتها بالحيلة
علياء:اي صحيت هاك قعدت بحذاه عملت عملة معناها؟؟
نورهان (تضحك):المرة هاذي ما عملت شي اما المرة الجاية اكيد بش نعمل
علياء:تعمل يدك في رقبتك معادش فما المرة الجاية اصلا
نورهان (تضحك):شكون قال؟
علياء:انا قلت
نورهان (جبدت تليفونها ووراتها نومرو):والنومرو هذا متاع شكون زعمة؟؟
علياء(تصدمت ووجها تقلب):كيفاش دبرتو نومروه؟؟
نورهان (تدكك علاها):مش توا تو في الدار نقلك
علياء (شدها العصب بدات بش تفقد اعصابها):مفماش دار توا تقولي منين جبتو نومروه؟؟وليت تبربشلي في تليفوني زادة؟؟؟
نورهان (باهتة فاها):شبيك يا بنتي؟ هدي روحك
وقتاش بربشتلك تليفونك انا؟؟اصلا انت من بكري وانت قاعدة بجنب عمر حتى القعاد مقعدتش حذايا
علياء(تصدمت):هو الي عطاهولك؟؟
نورهان (تضحك):تنجم تقول
علياء (زادت فقدت اعصابها):شنوا الي انجم نقول؟؟بش تنطق ولا؟
نورهان :هاو بوك جاء تو مبعد في الدار نحكيلك
علياء:ياخي انت مروحة معايا؟
نورهان:اي وكلمت امي قلتلها علياء بايتة وحدها خلي نونسها قتلي باهي
علياء (تغزل اما منجمتش تقولها لا مهما كان هاذي صاحبتها رغم انها من العصب ومن الغيرة كان تلقى تخنقها علي ملكها هي اكهو وحتى وحدة ما تشاركها فيه تقتلها قبل ما تاخذ منها حبيبها الي تموت وتفنى فيه)
طلعو في الكرهبة ونورهان كي العادة تفدلك هي وبو علياء وتتعاند هي وياه (هو مكشخ وهي كلوبستيه) كيف كل مرة ايجي بش اشيعهم تلحم هي وياه على الترجي والافريقي وهذا الكل وعلياء ساكتة رغم الي مستانسة تبدا تحامي هي ونورهان خاتر هي زادة كلوبيستيه اما المرة هاذي ثنية كاملة سارحة وتخمم ونص الكلام بيناتهم ماهيش تسمع فيه
الحاصل وصلو للدار ركحت هي عشاء بوها وخوها وتعشات هي وصاحبتها ودخلو للبيت
علياء:هيا انطق توا وقولي نومروه شيعمل عندك وكيفاش خذيتو؟
نورهان(تضحك):مازالت غادي انت؟؟
علياء:اي ومنيش مسيبتك كان متقولي كيفاش خذيتو
نورهان:هو عطاهولي شبيك ياخي؟؟ياسر على اعصابك كان مجيتش نعرفك نقول غايرة عليه مني من بكري وانت تغزل تقول قتلت روح انا،،طفل عجبني ودبرت راسي وخذيت نومروه اش فاها عيب هاذي؟؟
علياء (قصت علاها):كيفاش دبرتو راسك فسرلي
نورهان:ماهو كي هبطت انت ودخلت بش تمدلي التليفون قتلو ميسالش تعطيني نطلب روحي بش تلقاه فيسع علياء خاتر يحتمل طاح تحت الفرش (تضحك)وهو كالناس الملاح مدلي تليفونو وطلبت نومرويا voilà
علياء:يقوى عليك ربي معناها في درج خططت لكل شي تحت حس مس وانا نتبع فيك كالبوهالية
نورهان(تضحك):لا عاد مش لكا الدرجة بهليلة صغييرة اكهو
علياء (كان تلقى تقتلها):باهي صحيت يا ذكية فسخ النومرو توا
نورهان (تضحك):وعلاش نفسخ فيه؟؟تي توا بش يحلى الجو ساعة،، عس عليه الليلة كان ما يطلبنيش اعمل شتحب
علياء (ضحكت ضحكة متاع تمقعير):مخص عقلك
نورهان:على شنوا تخاطر كان منطيحوش ولد خالتك انا معادش نورهان بنت مفيدة
علياء:علي تحب عليه نتخاطرو،، علي ونعرفو البنات الي كيفك ما يعجبوهش

نورهان (تضحك):مالا تو تشوف بعينيك يعجبوه ولا لا
علياء(مدتلها بيجاما ورماتهالها على وجها وهي قد ماهي مقتنعة انو علي مستحيل يعملها ويصوحبها قد ما ثيقة نورهان في روحها وعيناها الي كلهم خبث دخلولها الرعب في قلبها هي طفلة وتعرف كيد النساء وانهم كي احبو يوصلو لحاجة يوصلولها):شد البس تحرك ونقص من الاحلام الفاضية متاعك
نورهان:حبيبي اذاكا عاد توا
علياء :تو تعيا وانت تقبض
نورهان(تبدل في حوايجها):تحب تشوف بعينيك؟
علياء:شنوا الي تحبني نشوفو بعينيا؟؟
نورهان:هاني بش نطلبو ونعلق ونشوفو اعاود يطلبني ولا لا؟؟
علياء:اي هاو طلبك ومبعد؟؟في بالك بش تولي صاحبتو اكاكا؟
نورهان(تضحك ضحكة متاع دك):مش بركا صاحبتو وحبيبتو ومرتو زادة كان لزم وبش نجيب منو 3 ولا 4 صغار
علياء(ولات تضحك):جاب ربي الصباح تشكك فيه وعاجز وبارد توا بش تحبل وتجيب منو حارة مفرخة اصلا كان يسمع بركا انك قلت عليه الكلام اذاكا الصباح ما يكور بيك تكوير
نورهان:وهو شكون بش اوصلهولو هالحديث؟
علياء (تضحك في ضحكة متاع دك):انا مثلا
نورهان:لا نعرفك ما تعملهاش
علياء:وراسك انت نعملها كان متنحيش الطفل من مخك وتتلهى في الريفيزيون متاعك الي مازللها شهر توا وتمحيه علي من تفكيرك
نورهان (تغزرلها باهتة):تفدلك مش هكا؟؟
علياء:لا منيش نفدلك صحيح انت صاحبتي وعشرة وعبارة اختي وعندي توا عامين ملي نعرفك وبالاحرى انت الوحيدة الي عرفتك ملي جيت نقرى في الليسي هذا اما كل حاجة في بلاصتها علي اذاكا خط احمر لذلك حاول ما تتجاوزوش بش منخسروش بعضنا
نورهان (تصدمت من كلامها):نخسرو بعضنا؟؟
علياء: انا الي عندي قلتو وتوا قوم خلي نبداو نريفزو للدفوار متاع غدوة معادش وقت
نورهان(حست كلام علياء وجعها في قلبها اول مرة تحس الاحساس هذا اول مرة علياء تحكي معاها بالحدة والقسوة هاذي اصلا اول مرة تحس انو ممكن ايجي نهار وتخسر صاحبتها والي حاسبتها اعز من اختها سكتت لحظة وبعد غزرتلها في عيناها وسالتها سؤال رهوجها دخلها بعضها قاتلها):تحبو؟
علياء (بلعت ريقها وطبست راسها بش نورهان ما تشوف شي في عيناها اما قلبها الي كان ادق بالقوي وربثتها كانت مشلقة على كل شي ،،ضحكت ماشي في بالها بش اتلفها):اكيد هبلت انت بطبيعة لا علي كي خويا
نورهان (هزتلها راسها):تراه قولها وانت عينك في عيني انو كيف خوك
علياء (عملت روحها منرفزة):منيش مضطرة راني نبررلك كان جيت نحبو نقلك نحبو مناش بش نخاف؟؟
نورهان (شدتها من يدها):مالا علاش هكا؟شبيك ترعش؟؟علاش فقدت اعصابك قبيلا كيف عرفت انو عطاني نومرو؟؟علاش طلبت مني اني نمحيه من مخي وانو خط احمر كي انت متحبوش؟؟عمرك ما حكيت معايا هكا!!عمرك ما تصرفت بالغرابة هاذي!! ماكش تشوف في روحك راك كيفاش تقلبت علي 360 درجة لمجرد انك عرفت انو عجبني؟؟ تحب تفهمني انك هذا الكل متحبوش؟؟؟اغزرلي في عينيا علياء نورهان انا نورهان الي تفهمك مغير حتى ما انت تحكي،،ملي عرفتك وانت كل ما يبدا نهار هو جاي بش ابات حذاكم تبدى طايرة بالفرحة تي توصل حتى تفسع ومتحضرش على خاتر بش تمشي تحضر روحك ليه ،،ما شفتش عينيك كي تبدا تحكي عليه ؟؟ امشفتش روحك كيفاش خرجت من صينتك وانت غايرة عليه هذا الكل وانت تخبي ومتحبش تظهر شي،،تي انت حتى عمر مصوحبتو اكاكا على عينين الناس اوكا بش اقولو مصوحبة واكهو الف مرة مسكين يحكيلي ويشكيلي منك واقولي راني نحسها مبدلة راهي مش كالعادة معايا راهي متغيرش وما تحزرش علي راهي تقعد بليالي متحكيش معايا خاصة في الصيف وقت تمشي لدار خالتك تنساه وتحقرو وتعمل في عذابو صنعة ،،علياء راك ماكش حاسة بروحك اما احنا الي دايرين بيك حاسين وبرشا زادة خاترك مشلقة على روحك مهما حاولت تخبي
علاش ما تصارحش امك وتقولها نحبو وعرسولي بيه؟؟علاش مخبية هالحب وهما مشيحين ريقهم والوجولو من بلاصة لبلاصة على زوجة المستقبل وانت هاك هنا بجنبو عاشقة وهابلة عليه؟؟؟ ميحبكش؟؟اكيد حبك الكبير ليه بالوقت تو اخليه هو زادة يعشقك علاش حارمة روحك كي الحكاية الكل مرهونة في كلمة منك
علياء (اطرشقت بالبكاء):خاتر حرام حراااام افهمها حرام حراااااام
نورهان (تغزرلها مصدومة):شنوا الي حرام؟؟؟شنوا هو الي اخلي حبك ليه ولا حبك ليه حرام؟؟
علياء (ترمات علاها تبكي في حضنها):خاترو خويا ،،ملي صغيرة قالولي انو خويا حرام علي نحبو وحرام عليه احبني خاتر مشاعري ليه ومشاعرو لي محكوم علاها تبقى مخبية مدفونة ومردومة خاتر حبنا حرام خاتر امو الي هي خالتي رضعتني وانا صغيرة خاتر امي وقت ولدتني قعدت شهر في البلوك بعد ما صارتلها كوبليكاسيون خاتر انا تولدت ومحكوم علي اني انكون اختو اختو اكهو ،،الكلام الي قلتو انت الكل نقول فيه انا كل يوم كل ساعة كل دقيقة كل ثانية نشوفو فاها ومنجمش نخرجو ولا نعترف بيه لحد كان لروحي لروحي اكهو كل ليلة نبات نبكي وانا نشوف في حلمي في عشقي وفي غرامي يدفن قدام عينيا نشوف في الراجل الي نحبو ونعشق التراب الي يمشي عليه يضيع مني وانا منجمش نفكو منجمش نتمتع بيه منجمش حتى نصيح ونعيط ونقول يا ناس راني نحب علي راني نعشق علي راني نموت من غير علي ،،كل ليلة نبكي كل ليلة نلعن حظي وحظو الي خلانا نكونو خوات علاش انا وياه اكهو اصير معانا هكا؟؟علاش امي مرضت وعلاش امو رضعتني علاش ترضع في من اصلو؟؟؟عمرهم ما سمعو بحليب يتباع في الفرمسي؟
ما خمتش وهي ترضع في انو ممكن ايجي نهار وانا نكبر ونتسخط ونعشق في ولدها؟؟؟علاش حرموني منو وحرموه مني؟؟شنوا ذنبنا احنا؟؟شنوا ذنبنا؟؟
نورهان (تعنق فاها بالقوي وتمسحلها على شعرها) :امان ما تبكيش،،سامحني سامحني انا سبب حيرتلك مواجعك،،لطف عليك يا روحي والله كان في بالي هكا عمري ما نحل فمي ونحكي فيه الموضوع (تبوس فاها من راسها)سامحني
علياء (باقي تبكي):مش انت الي لازمك تطلب سماح نورهان هما،،هما الي لازم يطلبو مني سماح ليل ونهار ومنيش بش نسامحهم خاترهم حطمولي حياتي قبل حتى ما تبدى،،دمرولي قلبي وحبي وكل حاجة حلوة حلمت باها
نورهان:انت كنت تعرف مل الاول انو خوك بالرضاعة علاش خليت روحك تحبو؟علاش وصلت روحك انك تعشقو وانت عارفة انو
علياء (تبكي بالشهقة):مش انا مش انا،،قلبي الي حبو قلبي الي عشقو وتغرم وذاب فيه منجمتش ومنجمش نتحكم فيه لقيت روحي كل عام انزيد نحبو اكثر كل عام عشق متاعو يكبر في قلبي اكثر كل عام انزيد نغرق ونغرق ونغرق اكثر
نورهان:وهو؟؟ ما حاولش افيقك؟؟ما حاولش امنعك قبل ما تزيد تغرق في حبو اكثر؟؟هو اكبر منك ب 15 سنة يعني واعي وعارف انو الي قاعد اصير بيناتكم غالط ومش بركا غالط حرام ولا ربي لا عبادو يقبلو بيه!! كيفاش طاوعك وخلاك وصلت للدرجة هاذي؟؟واصلا كيفاش يسمح لروحو هو انو احبك
علياء:فيقني فيقني مرة وثنين ومئة وصل حتى ضربني وقالي انا وياك منجموش نكونو مع بعضنا،، ابعد علي وقعد 3 سنين في المغرب بش يهرب مني وبش انسيني فيه اما انا منسيتوش منسيتوش بالعكس زدت حبيتو اكثر واكثر واكثر كنت كي نسمع بيه جاي نعمل المستحيلات الكل الي مش ممكن تتخيلهم في مخك بش نشوفو وبش نقابلو هبلت بيه وهبلت عليه معادش لا ناكل لا نشرب وصلت شربت الدواء وحبيت نقتل روحي غير منعوني في اخر لحظة ،،ناس الكل عامتها في بالهم انتحرت خاتر تاثرت بموت ماماتي اما انا لا انا انتحرت خاتر متخيلتش حياتي من غير علي منجمش نتخيل نهار علي معرس وعندو مرتو ترقد بجنبو ولا تحط ايداها عليه نغير عليه من نسمة الهواء نغير حتى من امو كي تبوسو من حبها ليه وحبو لاها متنجمش تتخيل انا قداش معذبة قداش محروقة حرقان ومليعة تليع راني نحبو بهبال بجنون وهو موش لي ومينجمش اكون لي قاعدة تحس بالي انا نحس بيه؟؟
نورهان(تعنق فاها):حاسة بيك وراس اختي حاسة بيك وزيد في الدنيا هاذي كل ممنوع مرغوب،،وساعات الحاجة تبدا ملكك وقدام عينيك وانت متحبهاش وومعينكش باها والي حاجة الي انت تعشق فاها ممنوعة منها ومعندك حتى حل كان انك تصبر وتدعي ربي يفرجها
علياء(تبكي):كان جاء صبري ودعايا احلو المشكل الي انا فيه راني بكيت ودعيت ليل ونهار راني صبرت الدهر بكلو مهم في الاخر ناخذو واولي متاعي وحلالي اما الي انا فيه حتى شي وحتى معجزة متنجم تمحيه ولا تبدلو هذا نصيبي نعشق الي مش لي ونتحمل عذاب حبي ليه طول عمري وحياتي
نورهان:متقولش هكا،،اكيد تو ربي اعوضك براجل اخر ايجي وانسيك في علي
علياء:لا لا لا مفماش وميجيش الي نسيني في علي خلفو هو منعطيش قلبي وبدني لحد
بعدو هو ما فما حتى راجل يملالي عيني حتى راجل ما يقدر انحي بلاصة علي هنا (حطت يدها على قلبها)كان هو نحبو وبش نبقى نحبو طول عمري
نورهان:وراس اختي توا تقول هكا اما الزمان ابدل
علياء:الزمان ابدل كل شي كل شي كان حبي وعشقي ليه
نورهان:تعذب في روحك هكا
علياء :عذابو راحة
نورهان:وهو بلاهي توا مهوش حابب اعرس خاتر زادة عاشق فيك وميحبش حتى طفلة تاخذ بلاصتك؟؟
علياء:هو عمرو ما قالي نحبك اما انا نحسو احبني
نورهان (تغزرلها باهتة):صار عمرو ما قالهالك؟
علياء:يمكن خاترو (سكتت)
نورهان:خاترو شنوا؟؟
علياء:منعرفش اما احساسي اقولي انو احبني وميحبش اظهر خاتر الوضع الي احنا فيه
نورهان:واينجم اكون زادة ميحبش اقولك خاترو ميحبكش وبالحق حاسبك كي اختو
علياء (ضحكت ضحكة متاع تمقعير):اي كي اختو اي باز
نورهان:انا نقلك هكا بش ما يجيكش نهار وتتصدم كي تكتشف انو احب ولا بش اعرس بمرا اخرى ممكن وقتها الله لا اقدر تمشي فاها نحبك تحط الاحتمالات الكل هو توا تبارك الله راجل ووقيت بش اعرس وكان مش اليوم راهو غدوة وكان توا اقول لا ومكيكس راهو بالزن في الوذنين والمرج والتخرنين متاع امو وامك اكيد بش اطيح راسو وياخذ وقتها انت لازمك تكون مستعدة للوضع الجديد لازمك تحبلو الخير كي انت تحبو هكا
علياء:لا هو ماهوش بش اعرس ولا ممكن نخليه اعرس خاتر كان اخمم نهار ويعملها نقتل روحي ونفضح هالحب هذا الكلو نخلي ناس الكل من بعدي يعرفو بجريمة عشقنا

غدوة في الصباح
فاقو علياء ونورهان دخلو غسلو وجوهم وركحو رواحهم وهابطو بش يفطرو ،،دخلو للكوجينة يلقاو امها ديجا تحضر في الفطور
عايدة (بضحكتها المعتادة):صباح النور
علياء (باست امها وقعدت في الكرسي ونورهان كيف كيف)
عايدة (مدتلهم الفناجن وصبتلهم القهوة):هاي نورهان بايتة حذانا،،مرحبا مرحبا يا ليلا والله ما تتصورش قداش فرحت كيف طليت عليكم الصباح وريتك راقدة حذا علياء،،خير كي جيت بيت حذاها على قليلة تونستو وريفزتو جميع
نورهان (غزرت لعلياء وشادة ضحكة):اي والله عديناها ليلة كاملة قراية،،شوف عينينا نحلو فاهم بالسيف تعبنا ياسر وقتاش توفى هالباك (وهما عداوها ليلة كاملة يحكيو على علي ما قراو كان نص ساعة ولا ساعة غير ربع)
عايدة:تو يوفى ويقعد كلو حديث تو تنجحو ونفرحو بيكم انشاء الله (غمزتها تفدلك)ونجي نخطبك لعلي عاد كيف ما تفاهمنا اكبس روحك انت بركا
علياء (غزرت لنورهان):لا تهنى امي حكات معاه وما عجبهاش
نورهان:تكذب عليك تاتا عايدة عجبني على الاخر زادة (ضربت علياء على ساقها بالسرقة)
علياء:علاش تضرب في؟؟قولها الصراحة،،عجبها قيس اكثر وقتلي قول لامك تعطيني ولدها وعلي مهوش جوها خاترو
نورهان (حطت يدها فوق فم علياء بش تسكتها):ما تصدقهاش تكذب عليك تحب تحرم علي خطبة متاعي انا وعلولو
عايدة (تضحك):نعرف نعرف اذيكا ديما اكاكا كل ما نجي بش نخطبلو وحدة تهبط فاها العيوب الكل ما غير ما تقولي
نورهان (هبطت يدها من فم علياء وحسبت روحها متعرف شي بالعاني حبت تزيد تنسها على حكاية قداش رضعت من مرة علياء):تطلعشي تحبو زادة ومهيش حابة تقولنا؟؟
علياء تصدمت قعدت تغزرلها باهتة
عايدة (ضحكت):شكون؟؟علياء؟؟لا بطبيعة خوها اذاكا (غزرت لعلياء)ياخي محكيتلهاش الي خالتك حبيبة رضعتك وقت كنت انت صغيرة؟ وعلي خوك؟؟
نورهان (قصت علاها قبل ما تجاوب):لا محكتليش الحلوفة،،اما انتما مثبتين تاتا عايدة انها اختو؟؟خاتر في بالي الحكاية هاذي فاها شروط معينة يعني لازم امو رضعتها خمسة رضعات لين شبعت وهي صغيرة قبل العامين قبل ما تتفطم يعني
عايدة:اي بطبيعة متاكدين ياخي الحكايات هاذم فاهم لعب؟؟اختي الي هي ام علي هي الي تلهاتلي بعلياء وقت انا شهر في البلوك بعد ما ولدتها وهي الي رضعتها وقامت باها
نورهان:اي بالك مش خمسة مرات بالك مرة ولا اثنين اكهو؟؟
عايدة:لا وه لا مرة لا ثنين فاش نحكيلك انا منبكري شهر كامل عندها وترضع فاها ليل ونهار يعني مفيهاش حتى ادنى شك الحكاية علياء وعلي خوات وحبيبة هي ام علياء كيف ما انا امها (تلفتت لبنتها سالتها)هكا ولا لا علياء؟؟
علياء (بطبيعتها داخلة بعضها زاد سؤال امها لاها كمل على ما باها جاوبتها بربثة):على شكون؟؟
عايدة:شنوا الي على شكون؟؟ياخي معانا ولا ماكش معانا؟؟قتلك حبيبة امك كيفي انا هكا ولا انا غالطة؟؟
علياء (حاولت تبردهابضحكة خافت لا امها تشك كي تراها اكاكا مبهظلة):والله داخلة في حيط صدقني مخي الكل في الدفوار متاع مبعد ،،بطبيعة امي مالا لا؟؟حبوبتي الغالية اذيكا
نورهان:بصراحة تاتا عايدة ومنحبكش تتغشش مني اما الحكايات هاذي متاع وحدة ترضع ولد اختها ولا ولد جارتها ولا ولد وحدة تقربلها عملت برشا مشاكل في برشا عائلات ربي يلطف بينا اما فما حتى الي خذات خوها ولا خذا اختو بسبب هالرضاعة هاذي كل واحد ارضع ولدو ولا بنتو وما مدخلوش في ولاد الناس فما حليب يتباع فما الف حل وحل بش الصغير يرضع مش بالضرورة حليب ام مصاب الناس الكل قبل ما اخمو ويرضعو صغير مش صغيرهم اخمو في احتمال انو انو يكبرو واحبو بعضهم كالخوات صدقني يا تاتا عايدة نعرف وحدة وصلت انتحرت نهار الي سمعت انو خطيبها والي اموت علاها وتموت عليه طلع خوها بالرضاعة تخيل انت في جمعة عرسهم فاقو بالحكاية كل شي بطل هذا الكل من جورت الكبار توحل مبعد في روس الصغار
عايدة (تفجعت):لطف
نورهان:والله يا تاتا وبرشا حتى عرسو وجابو الاولاد ومبعد طلقو وصغارهم ضاعو في وسطهم خاتر الحكاية هاذي زادة
عايدة:صحيح يصير مالا ميصيرش؟؟احنا الحمد الله ملي علي وعلياء صغار قلنالهم هالحكاية هاذي وفسرنالهم ه ،،هاو علي يقعد بالاشهرة يبات ويصبح عندي تي عملتلو بيت حتى وبجنب بيت علياء خاتر منخافش علاهم ونعرف الي اذيكا اختو وهذاكا خوها ،،وتراهم راهم ديما مع بعضهم والضحك واللعب والتفدليك ويدكك علاها وتدكك عليه الي اراهم اقول هاذم عاشقين في بعضهم وهما خوات ،،كيف ما قلت نورهان الغلطة في الكبار لازم هما اوعيو اولادهم من الصغرة
نورهان:انا من رايي الرضاعة كلها غالطة وتتسبب في المشاكل خاتر ساعات الحاجات هاذي ما يفيد فاها لا توعية لا شي القلب كي احب كالشخص اذاكا مهما بش تعملو مينجمش يخرجو خاتر الحب اعمى يا تاتا
علياء (قامت خاتر مواجعها الكل تحيرت وكلمة اخرى زايدة بش تطرشق خاتر معادش فاها):هيا ليلا هيا قوم خلي نمشيو قتلو حب اعمى وحب اطرش مازالت تحكيلي على الحب وهي معادش علاها بكري
عايدة:علاش تقيم فاها مازال بكري ،،تو نشيعكم انا بالكرهبة ،،خلي تحكيلي ساعة شعملت البارح مع علي
علياء (واقفة):بربي يا امي خلينا نمشيو والله لعاتها وقت وزيد انا حاجتي بعمر بش نسالو على حاجة مش فاهمتها قبل ما ندخل نعدي الدفوار
نورهان:ولاهي اش بش نقلك يا تاتا عايدة خلف اني دبرت نومروه مازالت معملت شي
عايدة (ضحكت وجبدت بنتها قعدتها):هي هاو باهي احكيلي هو الي عطاك نومروه ولا انت قتلو عليه؟
علياء (قصت علاها):بربي شنوا فيه الباهي هذا؟؟ياخي اول وحدة يعطاها نومروه؟؟نص بنات تونس يعرفو نومروه علي شو كالعملة الكبيرة
عايدة:مش كيف كيف،،اسكت على روحك انت كمل احكيلي نورهان
علياء (قامت وجبدت نورهان من يدها):والله نوعدك نحكيلك انا في العشية غير نمشيو توا بركا
عايدة:مصح راسك ،،باهي ستنى نشوف مفاتح الكرهبة وتو نشيعكم
علياء:لا لا مغير متشيعنا هانا ماشين باي
خرجت نورهان وخرجت
علياء (منرفزة على الاخر):ياخي نورمال انت تحكي في موضوع هكا قدام امي؟؟؟
نورهان:شقلت انا ياخي؟؟
علياء:شو كي مازالت تقولي شقلت!!! بالكشي تطلع تحبو ومتحبش تقولنا!! ياخي سافا با في مخك ؟؟ تحبها تشك فينا معناها؟؟
نورهان:تي شبيك ما تفهمش؟؟تي انا حبيت نسلكهالك ،،خاتر حبيت نعرف قداش رضعت من مرة
علياء (منرفزة):ما تسلكهاليش،،اصلا حتى حدمينجم اسلكهالي في هالموضوع ،،انحبو ومكتوب علي العذاب رتحت توا؟؟
نورهان:امان؟؟ياخي انا نحبلك العذاب؟؟تي انا ما تتصورش قداش مسخفتني وقداش قلبي واجعني عليك راك صاحبتي الغالية الي معنديش غيرها
علياء:مالا كان صاحبتك بالحق الموضوع هذا معادش تجبدو وخاصة خاصة حل عينيك لاتجبدو قدام علي ولا تحاول تحكي معاه فيه،،وهو من المستحسن متحكيش معاه جملا لا في الموضوع هذا لا غيرو
نورهان (تضحك):باهي يا ليلا منيش بش نحكي معاه علي متاعك ما تتغشش بركا،،تعرف مخيبك كي تبدا منرفزة؟تولي تتشبه مدام بيوض بروفة الفيلو
علياء (ضحكت):انا مدام بيوض؟؟
نورهان (باستها):لا توا كي ضحكت معادش تشبهلها ياسر
علياء:زح في عز اوقات الغش كيفاش يحلالك الضحك والتفدليك والله شعرة لا جلتني قبيلا قدام امي
نورهان:باهي يا ليلا سامحني معادش نعاودها
علياء:اي صحيت
الحاصل قعدو ثنية كاملة وهما يحكيو اكاكا لين وصلو للليسي
عايدة دخلت لبيت علي تلقاه مهوش غادي هزتلو حوايجو بش تغسلهملو وبالصدفة وهي تخمل طاحت من مكتوبو تصويرة كيف راتها تصدمت
في الوقت اذاكا علي كان راقد وفي حضنو مريم
فاقو على صوت التليفون
مريم (تفيق فيه):فيق علي تليفونك
علي (زاد عنقها):خليه ينبح
مريم:سكرو على الاقل،، الطفل بش افيق
دار بش امدو واشوف شكون طاحلو اكاكا و اسامة فاق بدا اوعوع شنعها
مريم (قامت وهزتو تسكت فيه وهو شي لا حب يسكت):باهي توا سي علي؟؟؟؟هاك فيقتو (مدتهولو)شدو على القليلة خلي نمشي نسخنلو رضعتو علي(خذاه من يدها وحطو بجنبو في الفرش و يلعب معاه في بالو هكاكا بش يسكت وهو باقي يبكي):تي شبيك شوهة يا فرخ؟طيحت التليفون سي بون اكهو لازم تشنعني معناها؟؟ (ابوس فيه)في بالي ولدي رجال ما يبكيش ،،لازم تحشمني معناها؟؟ اقولو ولد علي بكاي؟؟
وهو اكاكا يحكي معاه والاخر يغزرلو ويبكي لين دخلت مريم
علي (هزو وحطهولها في حجرها):هيا بابا هاي جات ماما بش تعطيك الحليبة (باسو من راسو وقام مل الفرش)
مريم (وهي ترضع في اسامة):فين ماشي
علي(يلبس في سروال البيجاما):شنوا وين ماشي؟
داخل ندوش
مريم:شكون الي طلبك؟
علي:عايدة
مريم(تنفخ مش عاجبها):عايدة ولا بنت عايدة ؟؟ماهمش حابين افكو علينا هاذم؟؟
علي (منرفز):تعرف شكون الي قاعد تحكي علاهم ولا لا؟؟
مريم(منرفزة):كل العادة كل العادة نفس الكلام ما تتبدلش
علي:على مش عاجبك؟؟
مريم:لا مش عاجبني قداش بش نقعد انا عايشة معاك في الوضع هذا؟؟قداش؟؟ قبل وانا وياك اكهو اما توا؟؟الطفل هذا الملايكة شنوا ذنبو؟؟
علي(يمسح على لحيتو):فاش تحكي براس امك؟؟شبيه هالملايكة؟ معيشو انت وياه احلى عيشة appartement haut standing ،، اعز ماكلة ،، اعز لبسة ،، اعز طبيب حارمكم من حاجة انا؟؟؟ (ولى اصيح)انطق شنوا الي مش عاجبك شنوا
مريم:تنجم ماهو تنقص من حسك الطفل بش تفجعو؟
علي:منيش منقصو حسي كل يوم نجي لهنا ولى لا؟؟
مريم:ياخي مزية؟؟(ضحكت ضحكة متاع تمقعير)بالك مزية انك تجي كل يوم لمرتك وولدك؟؟؟فيق مرتك راني مرتك مش صاحبتك
علي (قص علاها): اي هاك قلتها،، مرتي ومنيش ناكر فيك ولا ناكر في ولدي وعامل الي نقدر عليه بش نعيشكم احلى عيشة اكهو basta
على لازم كل يوم تنفخلي gلبي بنفس الخرافة؟
مريم:فين ترا فاها امان احلى عيشة؟؟؟ عيشتك معايا تسماها عيشة انت؟؟؟تجيني واطل علي ساعتين ثلاثة تمركي البريزونس متاعك وكان اتخذت اتخذت تبات حذايا وتقوم الصباح الفجاري تهرب كالسارق
نفيق ما نلقاكش تعبت راني تعبت افهم حس بي نحب راجلي معايا نحبك على طول بجنبي على طول في ظهري انت امان متاعي انت الراجل الي حبيتو وعشقتو وعلى خاترو ضحيت بناس الكل حتى بعايلتي،،مش هاذي العيشة الي تمنيت نعيشها معاك،،مش هكا حلمت تكون حياتي معاك محجتيش بش تعيشني في الجليز وفي الرخام محجتيش بالعز وبالرفاهية نحبك انت انت اكهو نحب نعيشو كيف اي كوبل معرسين نخرجو مع بعضنا نحوسو مع بعضنا نهزو ولدنا احوس مع بعضنا نحب الناس الكل تعرف اني مرتك نحب كي نخرج وانا يدي في يدك ما نخافش وما نترددش نحب نصيح ونقول للناس الكل هذا راهو راجلي
كي نخرج مع صاحباتي ويبداو معاهم رجالهم نحشم تفهم شمعناها نحشم؟؟ تعبت من اني نقول مش هنا في déplacement تعبت من اني نكذب ونخبي وندرق تعبت من اني نخبي راجلي الي ممنوع حتى اني نقول عليه راجلي ،، امي كل ما نمشي حذاها تمرجني بابا غاضب علي بنات خلاتي وعماتي يتمنيكو علي حتى انهم مهمش مصدقين اني معرسة وبصداقي كلهم اقطعو في واريشو واقولو مصوحبة واحد وجايبة منو طفل في الحرام فيقققق فيق راهم اقولو على ولدك ولك حرام ياخي انت لوقتاش ناوي تقعد هكا؟؟
علي:انت تعرف ظروفي وعارفة على شنوا قادمة مل الاول ،،مل البداية فسرتلك ومخبيت عليك شي رضيت تتحمل مسؤوليتك
مريم:لوقتااااش بش نتحملها مسؤوليتي؟لوقتاش؟عام عامين ثلاثة؟؟حتى ولدك يكبر واولي يفهم واولي ناقم عليك كيفاش معيشو هو وامو هكا؟؟كيفاش مخبيه ومخبي امو على امك وبوك؟؟امان شنوا بش تقولو نهار الي بش يسالك هالسؤال؟؟؟حاشم نقول لامي راني معرس؟؟؟حاشم نواجها اني عندي ولد؟؟ وهذا الكل علاش؟؟؟ خاتر خايف على مشاعر بنت خالتك الي ميتة فانية فيك؟؟مخليني عايشة هكا معذبة خاتر خايف تواجه عايلتك بالحقيقة ؟؟ وانا الي واجهت عايلتي على خاترك وتحديت الدنيا خاتر نموت عليك هذا الكل حتى شي بالنسبة ليك؟؟ مهم مشاعر ليلا علياء؟؟ مهم علياء ما يشدهاش كريز و تتنتحر؟ خلي تنتحر علياء شيهمني انا؟؟ شنوا ذنبي انا ولدي في علياء؟؟؟ فرخة صغيرة وانت اكبر منها ب15 سنة محطم حياة عائلة كاملة على خاترها؟ حارم روحك وحارمني من انو نعيشو مع بعضنا ونربيو ولدنا مع بعضنا على خاترها؟؟ لا وفوق هذا اختك بالرضاعة يعني لا تنجم تاخذها لا تاخذك
علي انا هي الي بش ننتحر انا مش علياء كان بش تبقى مواصل في هالمهزلة ،،حقي انا فيك وهاني عامين وانا مسلمة فيه متجنيش وساكتة تخرج تحوس وتسهر مع علياء متاعك ومع ولاد خلاتك وعماتك وساكتة تصوحب علي في البنات وسكت معرس بي وامك كل جمعة تشوفلك وتلوجلك في خطيبة وسكت اما توا معادش بش نسكت وحقي ولدي عليك منيش بش نسلم فيه من حقو انك تكون معاه ويكبر وهو في حضنك وبين ايديك ويرقد عندك واحل عينيك يلقاك بجنب امو وكي يفرح تفرح معاه وكي يمرض الله لا اقدر انت بوه الي بش تهزو لطبيب و تطمان عليه ولدك اذاكا قطعة منك دمك ولحمك ومن واحبك انك تتحدى الناس الكل على خاترو من واجبك انك تعيشو استقرار عائلي بين امو وبوه وعزيزو وماماتو الحكاية ما تطلبش حاجة كبيرة تطلب كان شجاعة منك ورجولية كون راجل مع ولدك على قليلة كي محبيتش تكون راجل معايا انا

عايدة مازالت مصدومة من التصويرة الي لقاتها في مكتوب علي تمنات الارض تتشق وتبلعها اش بش تعمل واش بش تقول وكيفاش بش تتصرف؟؟تقتلها ولا تقتلو ولا تقتل روحها هي الي الماء يجري تحت سقاها وهي مش فايقة؟؟علي ولد اختها الي طول عمرو عندها والي رباتو هي زادة عبارة ولدها يعمل هكا؟؟ ومع شكون؟؟مع بنتها الي كانت تضرب باها في المثل في العقولية وفي التربية وفي الحشمة علياء فرد فرش هي وعلي عراية الزوز في دارها يعني ما لزيش يفسدو وزيد مهمش حتى خايفين
علاش؟؟شعملت في حياتها بش اصير معاها هكا؟؟اختو راهي هاذي اختو وهي تعرف وهو يعرف اش بش تعمل وفين بش تخبي وجها مل العباد واش بش اقولو علاهم؟
كلمتو هو ماهازش وكي طاحلو التليفون وتسكر مشى في بالها علق علاها
عايدة(ترعش مل العصب):اه يا ساقط يا فاسد تعلق علي زادة؟؟(عاودتو طلبتو تلقاه مسكر)وكملت سكرتو زادة؟؟والله يا كلب والله لما نوريك النساء شتعمل
كان جاء بين اداها في الوقت اذاكا راهي قتلتو راهي كلاتو ماكلة راهي خذات حقها منو بايداها
قامت لبست حوايجها وهزت المفتاح وطول شدت الاتوروت للبنزرت كانت ثنية كاملة تشوف في الطريق ظلام مهيش مصدقة وقتاش بش تصل لدار اختها كانت مرة تبكي ومرة تتحلف ومرة تتفكر في احداث وتصاور جاو ما بين عيناها لها الدرجة هي بهيمة ومكانتش فايقة؟؟ولا هما زوز ذكين لدرجة انو حد ما وصل فاق باهم وبالي صاير بياناتهم ديما وهي معاه وفي بيتو شوف قداش من مرة عملها معاها وهي كانت راقدة تكخ في النوم لا في علمها لا في درايتها شوف قداش من عام عندهم مع بعضهم وحتى شي ماهو باين علاهم لا هي كان باين علاها كيفاش مغرومة بيه كانت عيناها عليه في كل لحظة ،،غيرتها كي تسمع بيه بش نعرسولو هبالها كل ما يبدا راجع للدارهم ولا مسافر تابع خدمتو فرحتها نهار الي ايجي بش ابات حذاهم ولا في الصيف كيف تبدا ماشية تعدي العطلة بحذاه
ملي صغيرة وهي الي اقلها شكون تحب انت تقولو نحب علي ياما كي كانت صغيرة وعاتها وفهمتها وفسرتلها انو هو خوها وحرام تقول انها هي تحبو،،كان شريط الذكريات يتعدى قدام عيناها علاش مجاش لبالها ولو مرة انها تراقبها ولا تراقبو كي يبدا بايت حذاهم علاش لها الدرجة هي نية وتعطي الثيقة ياسر للعباد
اما المشكل هذا ماهوش اي عبد هذا ولد اختها تي ولدها ولدها مش ولد اختها هو الي معملة عليه في كل حاجة هو الي يقضيلها ساعات قضيات حتى ولدها ما تثقش فيه كي يقضيهملها هو الي مدلتو ومبجلتو على ناس الكل حتى على قيس وعلياء ،،هو الي كي اطيح باها الدنيا كان ديما واقف في ظهرها سند لاها كانت تشعر بالحماية كي يبدا علي معاها ما تشعرش باها حتى مع راجلها وولدها هو الي كان حتى مل العرك والضرب يضربو كي يبدا حد تعدى علاها هي ولا ولادها كانت تتعارك هي وبوه كي يعاركو ولا يتنابز معاه تهرب بيه لدارها وتخبيه بش تحميه ياما تعاركت هي وامو كي تضربو تقولها علي اذاكا ولدي رد بالك تحت يدك عليه علاش ما خلاتهاش ضربتو ورباتو علاش حمات عليه وقت الي هو كي كبر ما تفكرش هذا الكل وطعنها في ظهرها خان ثيقتها فيه خان الماء والملح الي كلاه في دارها خان الراجل الي فاتحلو دارو والي اقولها علي كي قيس متخليهش اروح انحبو ديما معانا ما خممش وهو يعمل اكاكا في طفلة صغيرة وزيد اختو شنوا ممكن اكون موقفو قدامها وقدام بوها وخوها؟؟ما خممش في امو وبوه كيفاش ممكن يتجلطو كان يسمعو بيه عمل عملة كيف هكا؟؟ما خممش في مستقبل كالبنية الي هلكها والي قضا علاها ؟؟جاب ربي جات دمو ولحمو جاب ربي تربات معاه وكبرت وهي بين ايديه،،تي هو الي كان اهزها للمكتب واروح باها واقراها ويخدم معاها دروسها،،هو الي رباها معاها هو الي ساعات كي تبدا هي لاهية ياخذلها حتى البيي وادخلها حتى للكلاس العائلة كاملة الجيران سوا في دار متاعهم في تونس ولا في بنزرت كلهم يعرفو انو خوها حتى حد ما اينجم يتكلم ولا الوم كي هو اعيش معاهم حتى صحابها وصحابو يعرفو هذا كيفاش قادر امس واحط ايديه على طفلة يعرفها اختو؟؟كيفاش يوصل يستحلى بدن حرام عليه ليوم الدين ،،لهالدرجة نجم يتخلص من انسانيتو ومن اخلاقو ومن مبادئ متاعو؟؟اغتصبها ولا برضاها ؟؟هي جبدتو ولا هو جبدها؟؟وحتى كان هي جبدتو صغير هو بش هي الي تخليه يوصل يعمل اكاكا؟؟ضربها بكاف كلاها بطراحة شكا باها لاها حتى بالسرقة كيفاش احس روحو راجل وهو راقد مع اختو؟؟كيفاش ضميرو ما انبوش ولا وبخو؟؟عادي يعني يتمكن باها في الليل والصباح اقوم يحكي عادي وافدلك ويضحك وكينو ما فما شي
(تفكرت كلام نورهان لاها الصباح)وقالت يا مصيبتي كان تطلع حكات لنورهان زادة على الي صار بينها وبينو
كلامها وراه برشا رميان معنى غير هي مفهمتوش كانت الطفلة تبعثلها في رسائل تحت حس مس وهي كالدغفة تحكي على نيتها وتقولها علي وعلياء خوات
توا فهمت علاش نورهان تسال فاها وتعاود على حكايات عدد الرضعات اكيد و 100 في 100 حكاتلها وفضحت روحها مع كاللفعة اذيكا غدوة الخبر تلقاه في ليسي كامل وفي حومة كاملة على قد ما عاشت حياتها بكرامتها وبعزة نفسها في لحظة بنتها بش اطوتلها راسها وبش تخلي سيرتها على كل لسان
الحاصل قعدت ثنية كاملة وهي تحكي اكاكا بينها وبين روحها لين وصلت للدار

حبيبة (سمعت صوت النقوز خرجت بش تحل الباب ،،شاخت كي لقاتها اختها عنقتها وتبوس فاها):مرحبا مرحبا،،شبيك هكا على غفلة علاش ما قتليش جاية؟؟ساعة انا درج وكنت خارجة انا وسليم حمد الله خلط علينا في اخر لحظة
عايدة (دخلت قعدت في الصالة وهي تتسومم وعلى أعصابها):مكانش عندي وقت بش نطلب ونخبرك هاني جيت واكهو وخرجتك مع سليم اجلها خاتر حكايتي انا الي بش نحكيهالك اهم برشا يظهرلي
حبيبة:اي مرحبا بيك هكا توا؟ بطبيعة انت اولى يا عايدة يا غالية والله ما تتصورش قداش فرحانة خاترك جيت حذايا،،خنمشي نعملك قهوة
عايدة:لا لا منحب شي حاجتي بيك انت اكهو ،،سكر الباب وايجا
حبيبة (تفجعت):علي بيه حاجة؟؟
عايدة:لا مش علي الي بيه حاجة،،بنتي انا الي باها
حبيبة (صاحت):علياء؟؟؟ شباها بنيتي اش صارلها؟؟
عايدة (مدت التصويرة من ساكها وعطاتهالها):هاو اش صارلها،،وكان تحب زيد اسال ولدك مليح تو اقلك شصارلها،،هذا علي الي حاسبتو ولدي وثيقتي عمياء فيه هاو كيفاش كفاني،،شفت ماهووو شنوا جزاء الي تحسن ليه؟
حبيبة (شادة التصويرة وايداها ترعش ودمعتها هبطت بكشت معرفتش حتى شنوا تقول ولا تنطق)
عايدة:ولدك قضالي على مستقبل بنتي راهو حطملي الطفلة وهي مازالت صغيرة حتى الباك متاعها مازالت مخذتهاش
حبيبة (قصت علاها وهي باقي مش مستوعبة):بالك افدلكو مع بعضهم ،،بالك مش بالحق التصويرة؟؟بالك مفبركينها،،علي ولدي ونعرفو مستحيل يعمل هكا اختو اذيكا راهي اختو،،بالك فما شكون عندو بونتو بيه عمل هكا بالعاني
عايدة (زاد طلعها العصب):بربي نقص بلا بهامة متاعك قتلي مفبركة (فكتلها التصويرة من يدها و توري فاها)شوووف شوف كيفاش راقد وهو عريان وهي صدرها الكل فوق صدرو وتبوس فيه وتصور
حبيبة:اي هاك قلتها هو اوكا راقد بالك بنتك هي الي طيشت روحها عليه تعرف مليح انها ملي صغيرة كانت عاشقة فيه
عايدة (ولات تصيح):توا ولات بنتي الي رامية روحها عليه؟؟؟ معادش علياء بنتك والي رضعتها وكبرتها انت؟؟توا عاد بش توحلها فاها وتخرج ولدك مل اللعبة
حبيبة :باهي نقص مل الحس سليم مازال في الدار
عايدة:منيش منقصة فيه حسي وخليه يسمع سليم انا اصلا انحبو يسمع بش يعرف ولدو الساقط شعمل في اختو ،،خليه يسمع بش ما الومني حد كي بش نشكي بيه ولا نخلي بوها وخوها اقطعوه تقطيع،،بالك في بالكم بنتي ما ورهاش رجال؟؟قيس بركا كان يسمع ولدك اذاكا معادش تحلم بيه حتى في الاحلام
حبيبة (تهدي في اختها):بلاهي يا عايدة بلاهي احكي بشوية برحمة بابا ،،ياخي انا نحب هذا اصير؟؟مش بنتي اذيكا؟؟نحبلها المضرة؟؟الله غالب توا الي صار صار انا حكيت معاك هكا حبيت نفهمك الي احنا الزوز ما كناش معاهم ومنعرفوش كيفاش وصلت الحكاية للمواصل هاذي
عايدة (منرفزة):مهيمنيش ومنحبش نعرف كيفاش وصلت للمواصل هاذي وميهمنيش شكون جبد الاخر الاول ولدك اكبر منها يعني حتى كان هو الي يردعها وياكلها بطراحة وايجيني ويحكيلي مش هو الي اواصل معاها،،في داري واخون في ويلعبلي بعقل الطفلة في داري واخون في الراجل الي حلو دارو وحسبو ولدو،،اختاه منا احنا مخممش في خالقو؟؟مخممش في عقوبة ربي سبحانه؟؟ زاني باختو راهو تفهم شمعناها اختووو؟؟؟
سليم (الي كان يسمع فاهم البرا دخل وقال كلمة خلاهم الزوز مصدومين):ماهيش اختو
حبيبة (خزرت لراجلها ومهيش مصدقة كيفاش وصل وقال هكا):سليم!!
سليم (قعد بجنب مرتو):ماهيش اختو علي هو ولدي انا من مرا اخرى ماهوش ولد حبيبة
عايدة (غزرت لاختها لقاتها مطبسة راسها)
سليم:وقت الي عرست انا وحبيبة وسافرنا للمغرب كنت انا في الوقت اذاكا على علاقة بمغربية كانت تخدم معايا وصار الي صار وجبت منها علي وبطبيعة حبيبة مكنتش في بالها بهالقصة كانت تعيش معايا وهي راقدة على وذناها مفيبلهاش بالماء الي يجري تحت سقاها للحد لين جاء نهار وجيتها وانا في يدي علي وخبرتها بقصتي الكل وهي يرحم ولداها كانت بنت اصل وسترت على هالفضيحة وخبات هالسر العمر هذا الكل وعاملت علي كي ولدها رغم اني وقت جبتهولها مازال مغلقش حتى العام امو الله اسامحني واسامحها توفات في حادث وخلتهولي وانا مكانش في مقدوري اني نعمل شي كنت عندي زوز خيارات يا نطيشو في ملجأ ونتخلى عليه يا نواجه حبيبة بيه و نخلاها هي وضميرها ،،خذاتو من يدي و عفست على جرحها ورباتو قول عليه ولدها وعلى خاتري وعلى خاترو كذبت على الناس الكل حتى عليكم انتما توا 33 سنة وهي مخبية وحافظة هالسر
عايدة (تغزر لاختها كيفاش طول ما راجلها يحكي وهي دموعها هابطة):وعلاش هذا الكل؟؟علاش مش الاول حكيتولنا؟؟علاش السنين هاذي الكل ساكتة؟؟؟علاش خبيت حتى على اقرب الناس ليك؟؟كان حكيتلي لي انا كنت بش نفضح سرك؟؟
حبيبة (تبكي):محبيت حد يعرف بش حد ما يشمت في
عايدة (باهتة):شكون بش يشمت فيك؟؟امك بوك اخوتك بش يشمتو فيك؟؟؟
حبيبة:انت اكثر الناس الي كنت تعرف انو بابا وامي مكنوش راضين ياسر على عرسي بسليم خاتر بش نبعد على تونس كانو بش يطلبو مني نطلق ونخليه هو وولدو كان سمعو بحكاية الطفل الي جايبو ،،كنت نحبو ومازالت نحبو لدرجة اني ضحيت بكرامتي على خاترو وبش منسلمش في حبيبي الي كنت نشوف فيه هو اكهو في الدنيا،،تقهرت وتحرقت وادمرت نفسنيا اول ما جاء وقالي هالخبر حسيت بخيبة امل كبيييرة اكبر ما ممكن عقلك يتخيل حسيت انو الي ضحيت على خاترو ضحى بي وبكرامتي في اول نزوة في حياتو اما تعرف شنوا الي كان مصبرني؟؟علي،،اي علي بش تستغرب كي بش نقلك خاتر الي حسيتو وقت الي حطهولي بين ايديا منجمش نوصفو كان اشب صغير نراه في حياتي ضحكتو الي ضحكهالي اول مشديتو ما نسيتهاش ولا بش ننساها طول عمري حبي للسليم في لحظة ومنعرفش علاش ولا كيفاش الكل تصب فكالصغير الي حملتو وضميتو للصدري حسيت انو هدية بعثهالي ربي حسيت انو ولدي انا مش ولدها هي دمعتي الي هبطت على خدو وهو يضحكلي كانت احر واغلى دمعة بكيتها في عمري ريت فيه سليم صغير من وقتها حلفت وعاهدت ربي اني بش نكون انا امو بش نعوضو على الي امو الي توفات وخلاتو عاهدت ربي اني بش نخبي هالسر لين نموت ومنخليش علي احس ولا ناس توصل تقولو راك ولد حرام عاهدت ربي بش نكونلو احن ام في الدنيا احن حتى ملي مشات ،،كانت امنيتي اني نعرسلو ونفرح بيه ونشوف ولدو ولا بنتو قبل ما نموت هذا الشي الوحيد الي تمنيتو
سليم:الغلطة الي غلطها مع علياء اكيد تو نصلحوها تمنينا هالسر ما يتفضحش اما كالحكاية ولات فاها شرف طفلة بريئة معندها حتى دخل انا مستعد
حبيبة:لا سليم لا منيش بش نخليك تقولو علي ما لزموش يعرف انو انا منيش امو منحبوش يكرهني ويكرهك ويتعقد منحبوش يعرف انو هو ولد حرام علي ولدي انا ولدي انا اكهو (ترمات في حضن اختها واطرشقت بالبكاء)
عايدة (تسكت فاها ومهيش عارفة تبكي علاها ولا تبكي على بنتها)
قدام الدار علي هازز ولدو ومريم بجنبو
سليم حل الباب وقعد يغزرلو ويغزر للمرا الي معاه والطفل اللي بين ايديه مصدوم

قدام الدار علي هازز ولدو و مريم بجنبوا
سليم حل الباب وقعد يغزرلو ويغزر للمرا إلي معاه والطفل اللي بين ايديه مصدوم،، غمض عينيه وعاود حلهم يحب يتأكد ويثبت إلي شوف فيه حلمة ولا حقيقة،،عينيه وساعت،، وجهو صفار مبهم،،مافهم شيء،، كلمة مصدوم شوية عليه قدام إلي يحس فيه،، موش مستوعب إلي قدامو علي،، علي ولدو،،واقف قدامو بكل صحة رقعة.. جرئتو و وقاحتو زلزلت الدنيا في عينيه،، تمنى ما مسمعهاش هالجملة منو تمنى اموت قبل ما ولدو ياقف قدامو واقولو بابا هاذم مرتي وولدي وسامحني الي خبيتهم عليكم المدة هاذي الكل
ما فاق بروحو كان انو شدو مل الكول متاع السورية وغزرلو غزرة في حياتو ما غزرهالوش غزرة دخلتلو الرعب في قلبو خلاتو احس كينو رجع طفل صغير ويستنى في طراحة من طرايح بوه ليه قبل
سليم (وهو باقي شاددلو كول سوريتو):اسبقني توا للستيديو هاني خالط عليك
مغير ما ينطق بحتى حرف هبط علي وهز معاه مرتو وولدو ودار وين موجود الاستيديو متاعهم الي تابع الدار كانو كل مرة يكريوه وبالزهر توا هاو فارغ
مدلها الطفل وشعل سيقارو وبدا يتكيف وهو في دوامة من الافكار والي زاد على مبيه اكثر أسئلة مريم ومرجانها ليه تحب تعرف علاش بوه تصرف اكاكا وعلاش منعهم من انهم يدخلو للدار وعلاش حتى ما هزش الطفل وباسو وشمجيبهم لهنا اصلا هذا الكل وهو ساكت ومئة حاجة وحاجة ادور في مخو
ما فماش درج ودق الباب قام علي بزربة وحالو
دخل بوه وهو يتسومم طول غزر لمريم وقاللها هز ولدك وادخل للبيت الاخرى عيش بنتي وسكر الباب عندي ما نحكي انا وولدي
مريم (شادة اسامة حبت تمدهولو بش اطفيه شويا ظاهر جاي يغلي وبش افرغ غشو الكل في ولدو ):هذا اسامة عم سليم ولد علي ،،شوف حتى من الشبيهة يشبهلو
سليم (شدلو يدو باسهالو وقاللها):ربي افضلو ،،اسمع كلامي عيش بنتي وادخل فين قتلك
مريم (تغزر لعلي مهوش هاين علاها تخليه وحدو هو عمللها براسو اخرج ياخي خرجت )
سليم (سكر الباب وراها وطول هز يدو وعطاه زوز كفوف )
علي طبس راسو وسكت
سليم:انت راجل توا تستخايل روحك؟؟
علي:بابا قبل ما تحكم علي خلي نفسرلك
سليم (اصفق): c'est bien الي مازالت متفكر اني بوك
علي:بابا
سليم (صاح عليه):منيش بوك ومنعرفكش،،مش ولدي انت،، ولدي مش هكا ربيتو مش هكا قريتو وعلمتو ،،ولدي ما يغدرش وما اخونش وما يكذبش،،فنيت عمري على خاترك كنت نخدم من بلاد لبلاد بش نوفرلك كل ما تستحق وكل ما تطلب كبرتك ورديتك راجل صرفت عليك ورديتك طبيب طبيب هوايش ياخي طلعتلي انت اكبر هايشة فاهم ،،فاش غلط معاك انا؟؟فاش؟؟خليتك مستحق ؟نقصت عليك حاجة؟؟طلبت مرة مني طلب وقتلك لا؟؟قتلي بابا نحب حاجة ولا شاهي حاجة وما جبتهالكش؟؟تعرس وتجيب الصغير وانا وامك اخر من يعلم؟؟هاذي تربيتي فيك؟؟نكرت فينا؟؟نكرت في امك وبوك الي شعرهم شاب بش انتي وليت هكا؟؟كبرت علينا يا علي؟؟؟كبرت علي وصلوك للي انت وصلتلو توا؟؟وليت راجل مش هكا؟؟34 سنةواحنا معادش عندنا علاقة بحياتك الشخصية اتحب وتختار وتعرس بالي تحلالك وتعجبك واحنا لازم نبلعو فامنا و نعنقوك ونبوسوك ونحطوك فوق راسنا انت ومرتك وولدك خاترك تشرفت وجيت خبرتنا بعد شوف قداش من عام عندك معرس،،على توا؟؟خليت الطفل ازيد يكبر شويا واولي يتكلم وهو الي ايجي واقولنا،،علاش زربت روحك؟؟مازال الوقت في يدك يا بابا (شدو من سوريتو )تكلم انطق يا ساقط،،تكلم لا نباسي عليك اليوم ونبعثك للجبانة وانا نكمل حياتي في الحبس خاتر نستاهل اني جبت واحد ط... كيفك
علي:كلامك صحيح ماديا انت مخليتني ناقص شي
سليم (باقي شادو من سوريتو واخلخل فيه):مالا علاش عملت هكا؟؟علاش؟؟كنا بش نقلولك لا كان جيت وقلتلنا يا بابا ويا امي نحب نعرس؟؟كنت منيش بش نمشي نخطبهالك ولا ننكر فيك؟؟امك وانا عشنا حياتنا نستناو في النهار اذاكا دارك الفوق بنيتهالك واثثتهالك نستاو فيك بش ادخل عروستك لاها نستناو في النهار اذاكا طول عمرنا تحرمنا حتى من اكا الفرحة واحنا الي عدينا عمرنا نفرحو فيك ،،شكون البو الي يعمل مع ولدو هكا؟؟قليل ياسر الرجال تشقى وتتعب بش تكون وتبني الديار واحنا جهزنالك كل شي كل شي تغسل ساقيك وتدخل يعني،،مش لازم انا،، ما خممتش في امك؟؟ما خممتش شنوا ممكن اصير فاها كي تعرف؟؟تتمنيك علاها وعلي معناها؟؟كل ما تجيني نبدا نوعي فيك ونقري فيك وانت تلعبلي بعقلي؟؟قداش من مرا امك تحشمها مع النساء؟؟؟قداش من مرا خطبتلك وبلبزت وهبطلي راسي قدام الرجال؟؟هاذي سمينة هاذي قصيرة هاذي مهيش مثقفة هاذي سخطة على راسك،،هذا الكل وباقي نقول تو ربي يهديه وتو مصيرو يلقى بنت الحلال،،خليت حتى عموماتك يضحكو علي ويتمنيكو علي الي مدلك اكثر مل اللازم،،انا الي علمتك تكون حر ومتخلي حد.يفرض عليك رايو وتعمل كان الحاجة الي مساعدتك ،،ياخي طلعت فاهم الحرية بالغالط،،طلعت تربيتي فيك حرام وكل حاجة عملتها معاك حرام،،حتى كان غلط وحبلت المرا راك جيتني وقتلي نعرسلك باها انا وتحت عينيا و نسترها ونستر على فضيحتكم ولدك يتخلق وهو بين عايلتو بين عزيزو وماماتو الي بش احبوه ممكن اكثر حتى من حبك ليه،،تي انت حرمتني حتى من اني نشد حفيذي ونبوسو ونشهدلو في وذنو حرمتني من اي فرحة يستناها بو من ولدو،،حكمت على روحك وعلى ولدك انكم تعيشو في السر،،بش تخلي الناس الكل يحكيو عليك وعلينا وعلى ولدك الي حد ماهو بش يرحمو وكلهم بش اقولو عليه ولد حرام
علي (يدو ترعش مل العصب):مهوش ولد حرام وقت تولد انا وامو عندنا عامين معرسين
بوه (زاد هبل):معناها ماخذها عن قناعة؟؟ومش حتى تصليح غلطة؟؟3 سنين ولا اكثر معرس واحنا راقدين على وذنينا يا ط...؟؟ 3 سنين تستبله فينا وانت عايش في العسل مع المدام؟؟
علي:خفت نواجهكم
سليم (زاد عطاه كف اخر):خفت؟؟ وهو انت تخاف اصلا؟؟؟شيطان انت،، شيطان لابس حوايج،،شبيك ما خفتش وقت هزيتها وكتبت علاها الصداق بالسرقة علينا؟؟شبيك ما خفتش وانت جايب منها صغير كيف كيف بالسرقة علينا؟؟شبيك ما خفتش من انك توجعنا وتحسينا بالمذلة والرخص؟؟علاش ما خفتش من عقوبة ربي كي تستعار بولديك ومتحضرهمش في عرسك؟؟
علي (قص عليه):عمري ما استعرت منكم ولا بش نستعار انتما تاج فوق راسي اما الله غالب هذاكا الي صار ونعرف عندكم الحق تتغغشو و تفدو مني وحتى تضربوني اما تاكد يا بابا اني ما وصلت عملت هكا كان بش نحمي ناس الاخرين
سليم:شكون بش تحمي؟؟
علي سكت
سليم:انت ما خممت تحمي حد انت تخمم كان في روحك ولدي ونعرفك ملي صغير اناني،،تعرف علاش انا توا مخليتكش تدخل؟؟ما سالتش روحك مش هكا؟؟خالتك عايدة الفوق مع امك المسكينة الي مازالت مرهوجة بخبر عملتك مع علياء ،،مازالت تتفكرها علياء مش هكا؟؟اختك الي تعديت علاها واغتصبتها كالحيوان يا حيوان
علي جاء بش يتكلم بوه زادو كف اخر:في بالك ذكي مش هكا؟؟في بالك كي انت تخبيه هالسر مهوش بش يتكشف؟؟في بالك بش تقعد طول عمرك تعيش مع هاذي في السر وعايش مع الطفلة الي امها حالتلك دارها وحسبتك ولدها وفي الاخر اطيح بين اداها تصويرة بنتها راقدة فوقك وانتما عرايا الزوز ،،هاذي رجوليتك مش هكا؟؟؟تستحلى في بدن اختك الصغيرة
علي (نطق خاتر معادش اينجم اخبي الي في قلبو صاح في وجه بوه كيف ما عمرو ماصاح قبل اطرشق ومعادش اهمو شنوا عاقبة كلامو ولا شنوا بش يقولو عليه معادش اهمو حتى مريم الي كان متاكد انها واقفة ورا الباب وتسمع في كل كلمة قالها وبش اقولها):ماهيش اختي علياء ماهيييش اختي ولا عمرها كانت اختي فيقو فيقققو من هالكذبة الي عيشتوني فاها السنين هاذي كلها احشمو على رواحكم واعترفو باغلاطكم قبل ما تلومو وتعاتبو غيركم علاها ،،تلوم في انا خاتر عرست وجبت وليد وخبيت عليك شبينيي انا ما لومتكش كي صوحبت امي ال femme de ménage الي كانت تجيك للبيرو متاعك تنظفهولك؟؟ شبيني ما لومتكش كي ضحكت علاها وكتبت معاها ورقة عرفي وعشت معاها عام ونص ؟؟عام ونص وانت تخون فكا المرا الي حبتك و عشقتك وهربت معاك لاخر الدنيا وضحات حتى برضا ولداها اكا المرا الي مخلاها في الدار اطيب وتسيق وتمسح وتغسلك في حوايجك وتحددهملك وانت تخرج تزنا مع مرا اخرى في البيرو الي نورمال مون مجعول بش تخدم فيه؟؟ علاش ما لمتكش انا على انك عيشتني طول عمري في كذبة انو حبيبة امي وعايدة خالتي وعلياء اختي جاي تلوم في اني حرمتك من فرحة انك تشوف عرسي وولدي وانت الي بانانيتك حرمتني من الطفلة الي حبيتها ملي انا صغير من الطفلة الي تربات على ايديا الي عشت معاها ادق وكل تفاصيل حياتها ملي تولدت لين كبرت ولات صبية
ما خممتوش قبل ما تكذبو علي في شنوا ممكن تكون مشاعري وانا نشوف فلي نحبها محروم منها؟؟؟كنت نموت كل لحظة كنت نبكي كل يوم وانا نلعن في حظي وحظها الي خلانا نكونو خوات ،،حرمتني حتى من اني نقلها نحبك نقلها نعشقك ونموت عليك ومن غيرك،،ما خممتش حتى في مشاعري وقت الي نشوف في حببيتي قاعدة تكبر قدام عينيا ولا من حقي نقربلها لا من حقي نمنع اي حد يقربلها ،،ياما عاملت العرك على خاترها وضربت وتضربت وقت اي حد نراه بزنس علاها ولا حتى غزرلها غزرة هكا ولا هكا ،،كنت نحاول بكل ما نقدر اني نخبي مشاعري و ندفن غيرتي و هبالي باها خاتر عيب خاتر حرام خاتر ما يجيش خاتر انا الكبير وانا الي لازم نسيطر حتى علاها هي لازم نصدها ونمنعها من انها تزيد تحبني اكثر وقت الي انا مليع بحبها يمكن حتى اضعاف اضعاف حبها لي
كلكم خدعتوني كلكم تمنيكتو علي وعيشتوني في وهم وحرمتوني من حب عمري وعشق حياتي انت حبيبة وحتى عايدة الي نظن حتى هي شريكتكم في جريمتكم
اي رقدت معاها علياء ومش مرة ومش اثتين ومش ثلاثة اما عمري ما اذيتها اصلا كيفاش بش ناذي طفلة انا نموت بعشقها؟؟كل الي عملتو معاها حاجات سطحية مل الفوق الفوق وانت تعرف وتفهم عاد في الحاجات هاذي خبرة راك وانا اكيد وريثتها منك مش اقولو ولد الفار يطلع حفار؟اما انا خير منك تعرف علاش؟؟خاتر انت مش بركا ضريتني انا وضريت علياء انت ضريت امي وضريت حتى مرتك الي انا كان قعدت ساكت حتى لتوا راهو على خاترها هي،، عندي خمسة سنين ملي عرفت الحقيقة خمسة سنين ساكت وبالع السكينة بدمها وعافس على جرحي خاتر كالمرا الي رباتني وسهرت علي وتعبت علي ما هانش علي نفضح السر الي خباتو هالسنين هاذي الكل مهانش علي نواجها وناقف قدامها ونقلها راك ماكش امي امي الي جابتني توفات عندها اكثر من 35 سنة محبيتش نجرح كرامتها ونخلاها تتوجع وصورتها تتشوه قدامي حافظت على علاقتي باها كيف ما هي وما تبدل في شي معاها ولا معاك رغم اني كلمة موجوع ما توصفش شنوا كنت نحس فيه وانا نشوف فيكم تكذبو علي جهار بهار نشوف فيكم تحرمو في من علياء وساكت
نهار الي جاني التليفون من عند مليكة ،،اكيد تعرفو مليح هالاسم ولا السنين الطويلة نساتك فيه؟؟
مليكة هي اخت فطيمة امي ولا حتى فطيمة معادش تتفكرها زادة؟؟
ما صدقتهاش كنت مصدوم من هالخبر الي هبط علي كالصاعقة ،،ستدعاتني للمغرب وغادي وراتني و حكاتلي حكايتك مع اختها بالباء والتاء من اول ما تعرفت علاها في بيروك حتى لنهار الي عملت فيه الحادث وماتت،،هزتني لقبرها وقريت الفاتحة علاها و بكيت نهارتها كيف ما عمري ما بكيت قبل
بكيت على امي الي ميتة عندها 30 سنة وانا مفبليش باها،،انانيتك حرمتني حتى من اني نعرف قبرها ونجي نزورها ونترحم علاها حتى مرة في العام ،،حرمتني حتى من اخر ذكرى لاها،،ردمتها تحت الارض وردمت معاها كل حاجة تفكرك ولا تفكرني باها،،حتى تصويرة لاها مخليتهاليش ،،ما لزيش عذبتها وهي عايشة وحرمتها من كل شي حرمتها حتى في دعيوة خير من ولدها حرمتها حتى من انو ناقف عند راسها ونبكيلها ونشكيلها منك
بكيت زادة خاتر حبيبة الي كنت نعتقد انها امي والي حبيتها وحبتني طلعت هي زادة مش امي طلعت ضحية اخرى من ضحياك،، و بكيت اكثر واكثر على روحي الي طلعت في اخر حلقة ولد حرام
بكيت زادة على حبيبتي الي حتى بعد ما عرفت الحقيقة منجمش نقولهالها ولا نصارحها باها خاتر بش نخرب حياة انسانة اخرى قي يوم من الايام داست على كرامتها بش عاونتني بش نبني حياتي
وبش تطمان اكثر قبل ما نعرف انها مش اختي كانت علاقتي باها غير علاقتي من وقت الي فهمت انها مش اختي،،قد نكون اناني وساقط والي تحب اما ما وصلتش بيا الدناءة اني نحط يدي ولا نمس بنية نعرفها محرمة علي
نستعرف اني غالط وانو حتى كان هي بالحق مهيش اختي مش من حقي نصوحبها اما انا عملت هكا من قهرتي من غلي ومن حرماني انحبها انا والله العظيم نحبها ومعذب وانا معاها اكاكا اما معذب اكثر وانا بعيد علاها
وتوا اكيد راك عرفت علاش انا خبيت عرسي وخبيت ولدي خاتر خفت على مشاعر علياء بعد ما تسمع خفت انها تتصدم وحتى انها تكرهني وانا اهون علي نموت ولا علياء تكرهني ،،خبيت هالعرس علاها وعليكم وعلى كل الناس على خاتر علياء اكهو
اكيد بش تسالني علاش خذيتها مريم كي انت تحب علياء وكي انت عرفت انها مش اختك،،منيش بش نكذب ولا نتفلسف ياسر عليك خذيتها خاتر بعد علياء ما لقيتش حتى وحدة في الدنيا هاذي حبتني قد مريم وتحملتني قد مريم وصبرت علي قد مريم،،كانت تعرف بكل شي وقابلة بي،،كانت عارفة انها بش تتعذب معايا وراضية،،خذيتها خاتر ما فما كان مريم بحبها الكبير اذاكا تقدر تتحمل واحد كيفي معرس باها ومخباها تقول عامل جريمة وهذا الكل علاش؟؟خاتر طفلة اخرى ،،رغم اني كنت ديما نصيح علاها ونسكتها و نكذبها كي تقولي انت تحبها علياء الا انو احساسها كمرا اكيد كان اقوللها وحبي لعلياء كان يظهر علي مهما حاولت نخبيه
على فكرة انا متاكد انها توا تسمع في ونعرف انو ممكن حتى كلامي هذا اخسرني فاها واخسرني في اسامة الي نموت ونفنى عليه والي رغم اني كنت معارض انو ايجي للدنيا الا انو هو توا الحاجة الوحيدة الي مصبرتني على عذابي
بش نخرج من هنا توا وطول بش نمشي لعلياء بش نعترفلها بكل شي وبش نقلها الي مخبي في قلبي عندو سنين بش نفضح كل شي وبش نحماها منكم ومن امها ومن كل حد مازال بش ياقف في وجه حبنا بش نقولها الي حبي لاها وحبها لي عمرو ما كان جريمة عشق كيف ما هي تعتقد فما جرائم انذل واوقح من جريمتنا ارتكبوها ناس كنا في بالنا باهم ملائكة ياخي طلعو اكبر شواطن
وهو خارج جات مريم طول في وجهو (كانت هذا الكل ورا الباب)دموعها الي كانت هابطة والغزرة الي غزرتهالو محملش حتى انو اشوفها حل باب البراني وخرج مغير حتى ما يتلفت وراه
اما بوه ف ماتحملش المشهد وحط يدو على قلبو حس بوجيعة قوية طعنت صدروا ونهشت لعروق اللي في بدنوا.. هبطت من عينو دمعة ندم وحسرة ظرب بيدو على قلبو،، الدنيا دارت بيه ونفس تقطع عليه،، تظببت الدنيا قدامو وطاح في القاع على تلفيتتها مريم تلقاه اكاكا ما فهمت شي يا ويلها تخلط على راجلها الي خلاها في وسط المحرقة وهرب لحبيبتو يا ويلها من هالراجل الي طاح وما في عينو بلا ويا ويلها من اسامة الي اطرشق بالبكاء كينو حاسس ولا فاهم مليح اش قاعد اصير
مريم (تفيق فيه وتبكي وتحلو في الفلس متاع سوريتو ):عمي سليم عمي سليم امانك جاوبني اماااان ،،امان تنفس تنفس لحظة بركا لحظة بركا نمشي نعيط لعلي وايجيك (سليم كان ينزللها على يدها وهي تزيد تبكي اكثر )
حطت ساكها تحت راسو وخلات اسامة بجنبو وخرجت تجري تلقاشي علي مازال البرا لكن لا حياة لمن تنادي ما بقاش في يدها حل اخر غير انها تمشي لمرتو وتقولها
دارت تجري وطلعت في الدروج وبدات ادق علاهم بالقوي
حبيبة وعايدة تفجعو وخرجو يتجراو حلولها الباب

عايدة وحبيبة خرجو مفجوعين يتجراو سقاهم
اعلى من روسهم
وهنا كانتلهم اقوى صدمة ،،ولد شكون هذا ؟؟شكونها الي جاتها ادق في الباب قريب بش تكسرو و الي علمتها بانو سليم في الاستديو ودايخ؟؟شنوا علاقة سليم باها وبولدها كلهم أسئلة جاو لبالها وهي تشوف في راجلها طايح في القاع ويدو حاططها على قلبو ،،مكانش عندها الوقت حتى بش تسال مريم ولا تعرف الاجابة على كل الي في بالها اهم حاجة توا انها تمنع حبيبها وشريك حياتها من الموت رغم انو احساسها كان اقوللها انو وجاعة الخيانة متاع 35 سنة لتالي ظاهر فاها بش تتكرر وهالمرة اكيد بش تكون ضربة قاسمة لاها ولكل ما بناتو وضحاتو قبل
عايدة الي كانت تكلم في طبيب ويداها ترعش صدمتها ودهشتها الي كانت مسيطرة علاها مكانتش بعيدة ياسر على صدمة ودهشت اختها
مشهد صعيب انك تعبر عليه،، سكينة وتغرست في قلوبهم الاثنين وجيعتهم اكبر من انها تتوصف ،،الزوز احاسيس مختلفين وفي نفس الوقت ،،احساس بالخوف والرعب على الراجل الي قاعد اموت بين ايداهم وواجبهم انهم يعملو اي حاجة بش ينقذوه و امنعوه واحساس اخر بالاشمئزاز منو ومن غدرتو ومن وقاحتو من عدم احترامو حتى للشيب الي في شعرو راجل في عمرو مازال يغلط وايجيب في المفرخ وهو مكهب على الخمسة وستين سنة بانا وجه مازال بش اقابل الناس؟؟كيفاش تلوم على علي وهاو طلع بوه اتعس منو ،،تي علي في حد ذاتو الي مازال ما فيبلوش وما سمعش بحكاية امو المغربية كيفاش بش يغزر لبوه الي كمل خلط عليه صغير اخر ثاني في الحرام زادة
كيفاش بش تحكي لراجلها وكيفاش مازال يتقبل هالمصيبة الثانية الي طاحت على راس اختها وراس بنتها في نفس الوقت.........
في السبيطار
قاعدين قدام الباب على نار متوترين يستناو في الطبيب يطمنهم و هو خرج منا وهوما دارو بيه منا
الطبيب:حمدالله على سلامتوا،،لحقيقة باش نكون واضح وصريح معاكم المريض جاتو جلطة قلبية،، ونجا منها بأعجوبة،،و هذا يرجع نتيجة صدمة قوية على قلبو مانجمش يتحملها بدنو،، ماذبيكم ماتقلقوهش وبعدو عليه اقسى ما تقدرو الغش والستراس ،، المرة هاذي نجا المرة جاية الله اعلم،، في الوقت الحاضر حالتو مستقرة تنجمو تدخلو تشوفوه اما مذبيا ما تدخلوش مع بعضكم خاتر محتاج ايزيد يرتاح اكثر ما يمكن ،، وانشاء الله لباس
تقول سطل ماء بارد تصب عليهم،، كلام الطبيب فاجئهم وحيرهم،، الراجل كان لباس عليه صح سالم،، ماعندو حتى مرض،، شنوا الي قلتهولو هاللفعة هاذي الي قاعدة معاهم وشادة الطفل وتبكي بش في لحظة يوصل للموت!! زعمة الي في مخاخهم صحيح؟؟زعمة جات بش تواجهو بالصغير ياخي قلبو ما تحملش وطاح ساكت؟؟ هذا السؤال الي كان محير عايدة وملقتلوش ايجابة
اما حبيبة دموعها شلال متحسرة على عشير عمرها قلبها وجعها ماكنتش حاسة بالناس اللي معاها بقدر ماهي حاسة عليه،،مخها وتفكيرها الكل في راجلها يقوم لباس،، وماستناتش حتى طبيب يكمل كلامو طول دخلت تطمان عليه
والصدمة متاع اختها كانت اكبر وهي تشوف في حبيبة خارجة من عند سليم بعد اقل من درج و تعيط لمريم وتطلب منها انها تدخل وفوق هذا تسكر الباب علاهم وتخرج
عايدة (باهتة ومستغربة):كيفاش تخرج وتخليه راسو راسها؟؟ وشكون هي من اصلو؟؟ بش نهبل راني!! علي وطلع ولد وحدة مروكية وهاذي وولدها شكون زعمة؟؟
حبيبة (تمسح في دموعها):علمي علمك،،قالي عيط للطفلة وولدها واخرج هاني بجنبك توا صدقني واقفة بالسيف معادش عندي حتى قوة بش نجاوب اكثر
عايدة (منرفزة على الاخر):لا انا الي بش نتجلط المرة هاذي مش سليم مبرد دمك حاصيلو انا نغزل وانت هوني تنوح عليه،(تلفتت تلقى زوز رجال كانو قاعدين قامو)ايجا،،ايجا نقعدو نرتاحو طرف على الاقل،، ظاهر نهار مبروك من صباحو حتى هو
تعدات نص ساعة على دخول مريم بحذا سليم اطول نص ساعة تعدات على حبيبة من شيرة قلبها المحروق وعاجزة وخايفة ومن شيرة عايدة الي محبتش تسكت زادت مرجتلها كبدتها وزادت اكدتلها الشكوك اللي كانت تحاول تمنع في روحها انها تغكر فاهم ولا حتى تتخيل عواقبهم
خرجت مريم وعيطت لحبيبة واختها وطلبت منهم يدخلو
حبيبة (قعدت حذاه وباستو من راسو)
عايدة:حمد الله على سلامتك
سليم:اعيشك،، كان مش انتما منعتوني الله اعلم وقتها كان راني توا مازالت حي ولا مت
حبيبة:لطف عليك يا غالي،،ربي افضلك واخليك تاج فوق روسنا
عايدة (قصت علاها):اما الحقيقة الي منعتك بالحق هي هالمدموزال هاذي كان مش هي جات وقلتلنا رانا معلمناش
حبيبة غزرت لاختها معناها اسكت مش وقتو الكلام هذا
عايدة (كملت تحكي):علاش تحبني نسكت؟؟يظهرلي من حقنا نفهمو شنوا الي صار بالضبط!! ونتعرفو علاها وعلى هالصغير الي لقيناه بجنبك وانت مطيش في القاع يطلعشي هذا زادة في الحرام كيف ولدك الكبير
قبل ما يتكلم سليم مريم ضحكة ضحكة متاع تمقعير و حطت اسامة في حجرو وتلفتتلها قالتلها: لا يا مدام عايدة المرة هاذي انت غالطة وغالطة ياسر زادة،،اسامة ماهوش ولد عم سليم ولا انا صاحبتو كيف ما مخك قالك،، ولدي ولد حلال وانا معرسة انا وبوه والصداق متاعي فوقي،،اما زهري خلاني نطيح براجل اناني ما اخمم كان في روحو ،،حتى في عز ما انا محتاجتو بجنبي ياقف معايا وادافع علي وعلي ولدو هاو هرب وخلاني وحدي نواجه في التهم وفي السب وفي الاهانة ما خممش حتى في شنوا بش اصيرلي ولا كيفاش انتما بش تقبلوني وتقبلو ولدي هرب وخلى اهل البلاء في بلاهم
سليم: ماكش وحدك.مريم هاذي زادة عايلتك انا من اليوم بوك وهذي امك (مد الطفل لمرتو) هذا حفيذك يا حبيبة ولد علي، وهاذي مريم مرتو ،،عرس باها وخبى علينا واليوم هاي الحقيقة الكل تكشفت وطاحت الاقنعة الكل
عايدة (ضربت على صدرها وقالت):يا ناري على بنتي
في الوقت اذاكا علي ديجا وصل لتونس وتعدى طول للليسي متاع علياء قعد يستنى فاها يعرفها نهار الجمعة تكمل نص نهار
كان بينو وبين نفسه خايف من هالمواجهة طريق كامل وهو يحضر في روحو كيفاش بش يحكيلها وشنوا بش يحكيلها،، منين بش يبدا ومنين بش يوفى؟؟بش افرحها اكبر فرحة في حياتها بانو هو مش خوها ولا بش اوكلها اكبر صدمة بانو معرس وبولدو؟؟ وحتى كان بش اقوللها انو هي مش اختو وانو ولد مرا اخرى خلف خالتو كيفاش بش ابرلها سكوتو هالسنين الكل؟؟ كيفاش بش اجاوبها كي بش تقولو مدامك عارف علاش خبيت علي وخليتني معذبة وحرقت قلبك وقلبي معاك،كيفاش بش اتصدقو وتصدق حبو لاها بعد هالكذب الكلو الي كذبو علاها او بالاحرى خباه علاها ،، اصلا كيفاش بش يفسرلها ويقنعها انو كان ساكت على خاترها وبش يتكلم توا زادة على خاترها
قد ما بعد وتهرب من هاللحظة هاذي على قد ما خبى الحقيقة ودفنها وردمها مصيرو توا بش اقولها ويكشفها ويفضحها كلها مع بعضها سايي تسكرت في وجهو ومعندوش حتى حل اخر غير انو اصارحها و اواجها تعرف منو هو خير من عند غيرو
بش ما نطولش عليكم برشا خرجت علياء نص نهار لقاتو يستنى فاها قدام الباب،،طلعت في الكرهبة معاه وهي بش تموت بالفرحة كانت عيناها تضحك وحدها تبوس فيه وتعنق وتشم في ريحتو قول علاها عندها سنين ما شافتوش،،اما هو كانت فرحتها بيه وكلام الحب الي ثنية كاملة تسمع فيه فيه كالخناجر في صدرو كاره روحو وكاره حياتو وكاره كذبو الي بش احطم بيه قلب طفلة ما محبت و ما عشقت في الدنيا هاذي كان هو،، هو الحب الاول الي حلت عيناها عليه وهو الراجل الوحيد الي قادر بنظرة بركا من عينيه بكلمة حلوة ببوسة حتى خفيفة اخلاها اسعد انسانة في الدنيا اطيرها لسابع سماء كيف ما انجم انزلها لسابع ارض
وصلو قدام البلاص هبطو وعلياء اتبع فيه ومهيش فاهمة شي اما كانت عندها ثيقة عمياء للدرجة انو اهزهاشي للجهنم تمشي وهي فرحانة مهم تكون بجنبو ومعاه،،كانت بكل براءة تستنى في المفاجاة الي محضرهالها الي وعدها باها وهو في الكرهبة
حل علي الباب متاع البورتمان ودخلها وقعدها في الصالة
علياء(غرست روحا بين ايديه وباستو من صدرو و بعد وخرت راسها شويا وقتلو):دارنا الجديدة هاذي مش هكا؟؟ هوني بش نعودو نتقابلو ونسيبو هبالنا وحبنا وعشقنا كيف ما نحبو مغير خوف ولا رعب من اي حد بش اشوفنا ولا اهد علينا
علي (يغزرلها في عيناها سارح فاهم وعاجز انو يمنع روحو من انو يعشقهم اكثر ماهو عاشقهم الكلام الكل الي كان محضرو ومجهزو بش اقولو طار منو ضاع )
علياء(غرست راسها في رقبتو وتتنفس بالسيف وهي تبوس فيه شهوتها وغريزتها وكل شي فاها تحير وقتها متنجمش تقاوم روحها ولا تسيطر على بدنها الي كان ومازال يسخن ويشعل واولع دوب واول ما امس بدنو كانت تبوس فيه وهي في صينة اخرى في عالم اخر وفي دنيا اخرى خرجت من مخها ومن عقلها اصلا من وقتاش عاقلة في حبو ؟مجنونة هي بيه ومهبولة كانت تقولو):متوحشتك راني متوحشتك ومعادش انجم اكثر من هكا ميتة بحبك وعشقك انا
علي(مغير ما يشعر بعدها عليه حس الي هو زادة معادش فيه وبش ازيد يضعف اكثر واكثر واكثر كان ما يتكلمش توا وافيقها على روحها وافيق روحو هو زادة على روحو):امان علياء امان يزي،، يزي يكفي ما تزيدش تصعبها علي اكثر من هكا ،،ما تزيدش تحرقلي قلبي اكثر ماهو محروق
سكت لحظة وبعد قام من بجنبها وولى اصيح
انا احقر وامسخ وانذل من انك تقولي نحبك ونعشقك ونموت عليك انا انا اجبن من انك تضحي وتصبر وتتحمل على خاتري العذاب هذا الكل
هبط على ركايبو وشدلها راسها بيديه بالقوي وهو فاقد اعصابو :اغزرلي اغزرلي مليح كذاب انا وغشاش وساقط وخاين وخواف،، 3 سنين،، 3 سنين معرس وخايف نقلك،، خايف نواجهك خايف منك وعليك،،خايف على روحي وعليك،، خايف تكرهني وتحقد علي خايف تنكرني وتنقم علي خايف من صدمتك في من حرقتك علي من قهرتك من بكاك مني دموعك (يمسحلها في دموعها الي هبطت وهو يحكي)دموعك هاذي اغلى عندي من الدنيا كلها نحبك انا ونموت على الارض الي تمشي علاها نموت كي توجعك دgة الشوكة ، (شادلها راسها وغرسهولها في صدرو)انت بنتي واختي وحبيبتي وكل شي،،انت الروح متاعي،،انت الي ضحكة منك تسوى الدنيا وما فاها ،، انت الي تربيت على ايديا وبيديا ،،انت الي تعلمت معاك شمعناها نحب ونخاف ونحمي ونحافظ على انسانة نعشقها،،كنت اقرب حد ليك وكنت اقرب حد لي ومازالت وبش تقعد اقرب واغلى مخلوقة في الدنيا هاذي عندي
هي مظلومة كيفك واكثر منك حتى صدقني ،، ما لزمكش تخمم انها سعيدة معايا ولا انا سعيد معاها زهرها الم... خلاها تحب واحد كيفي انا خلاها تكون مرت راجل مخو وعقلو وتفكيرو في مرا اخرى ،،كانت تموت في نهار الف مرة وهي تعرف انها قد ما حاولت بش تاخذ قلبي منجمتش ومهيش بش تنجم خاتر الي ساكنة فيه حتى زلزال وحتى عاصفة ما تنجم تقلعها منو كنت في الساعات القليلة الي كنت معاها نخمم فيك انت،،نتوحشك ونشتاقك انت ،،نتمناك ونتخيلك انت
الي كانت تعطيني فيه هي ما تنجمش تعطيهولي انت ولا انا تتجرأ ناخذو منك خاتر ما يجيش خاتر عيب خاتر حرام ،،خاتر قالونا انا خوات،، انا راضعين من نفس الصدر انو الي اصير بين الراجل ومرتو ما يصيرش بيناتنا ،،انو امي رضعتك وانت صغيرة وولات هكاكا امك وانو انا ما لزمش نحبك ولا انت تحبني ورغم اذاكا انا حبيتك وعشقتك ومنجمتش نحبها هي ولا نعشقها هي
كنت نحس معاك انت اكثر ما نحس معاها نستحلاك انت اكثر ما نستحلاها هي،، ان... معاك انت احلى من ان.. معاها هي
نعرف اني ظالمها وظالمك وظالم روحي معاكم اما سايي تعبت تعبت ومعادش انجم نخبي اصلا معادش فما شنوا يتخبى كلهم عرفو وانت جاء الوقت بش تعرف خاتر معادش انجم نكذب عليك اكثر من هكا
قام ومدلها الالبوم متاع التصاور فرتو الكل قدامها
هاذي هي نهار عرسنا نهار الي صححت فيه على كالورقة الي من وقتها وانا مخنوق باها كالورقة الي باها هي عشت اتعس ايام حياتي منعرفش علاش صححتها ولا علاش عرست ولا علاش وصلت روحي لهنا من اصلو تقول كنت في دوامة في متاهة ضايع ومنيش عارف شنوا بش نعمل ولا كيفاش بش نخرج منها،،كانت هي واقفة بجنبي كانت الصدر الحنين الي نتكى عليه،،كانت الوحيدة الي نحكيلها وتسمعني وانا منيش خايف على سري معاها كانت الوحيدة الي نمشي نترما عندها ونبكي وتمسحلي دموعي وتبكي معايا زادة حبها الكبير لي خلاني نطمان وانا معاها خلاني نرتاح وما اجيني النوم كان وهي تلعبلي بشعري ،،الوجاعة الكبيرة الي كانت في قلبي بعد ما روحت مل المغرب كانت اقوى من اني نعيش باها وحدي ،،كنت محتاجها ،،محتاج كالصدر الحنين الي عليه نرقد ونرتاح
كنت اناني معاها وهي كانت عارفة، كنت خاينها وقابلة ،،كنت نموت بعشقي ليك وهي صابرة
مكنتش انجم نبعد علاها وهي الي عاطيتني هذا الكل ومغير ما تطلب مني شي
كان يكفاها انها تكون مرتي وعلى اسمي كانت اقسى امنياتها انو اكون عندها صغير مني ،،من الراجل الي حبتو الحب هذا الكل
ماكانش بيدي اني نمنعها تجيبو ماكنش بيدي اني نحرمها منو بعد الي ترجاتني وقريب تبوسلي سقايا بش تخليه
خممت فيك انت اول ما عرفت انها حبلة،، خممت في النهار هذا الي بش نواجهك فيه اكثر منها هي ومن ولدي الي في كرشها ،،خبيت هذا الكل كان على خاترك،،امي وبابا حرمتهم من انهم يفرحو بالنهار الي تمناوه طول حياتهم على خاترك انت حتى ولدي حرمتو من عايلتو على خاترك خاتر نحبك اكثر منهم نحبك اكثر حتى من روحي منيش طالب منك شي كان انك تسامحني وتخليني نبدا معاك صفحة جديدة هذا كل ما نتمنى وما نحلم بيه
اني نكون انا وياك تحت سقف واحد
علياء بدات تتبسم ،، التبسيمة ولات اكبر ،،ولات ضحكة ،،ولات تقهقه،،تضحك باعلى صوتها،،وهو مصدوم ،،توقع كل شي الا الشي هذا ،،كره روحو فكالللحظة وهي تضحك ودموعها ما كفوش ،،بقات ايجي درج وهي اكاكا وبعد سكتت فجاة بقات تغزرلو وعيناها حمر مل البكاء والغش والوجيعة)
طبس راسو واحس كان بيدها على خدو تمسحلو على لحيتو وبعد هزتلو راسو بصوابعها ،،غزرلها
علياء(تغزرلو في عينيه):هز راسك علاش طبستو؟؟ ولا حاشم مني؟؟ (ضحكت ضحكة متاع تمقعير)من وقتاش انت تحشم مني ولا ملي تعمل فيه معايا؟؟من وقتاش اصلا خممت في انا شنوا نحس وشنوا يوجعني وشنوا يشويني وشنوا يحرقني؟؟
اصلا انا شنوا؟؟
انا هم،، انا غلطة،،انا جريمه قاعد تعيش فيها انتي وتحب تتخلص منها وتمحي اثارها باي طريقة وباي وسيلة،، انا فيلم رعب بنسبالك ومذبيك يوفى وترتاح منو ،،كان مشوق في البداية تمتع بيه وشخت وتوا فديت منو وقلقت ومذبيك تبدى واحد اخر امتع واجد وخير ،، انا بنيه حبتك وحلت عينيها عليك،، اصلا كنت نشوف العالم بعينيك ،، كنت انت كل شي بالنسبة لي ،،من اول ما جيت لهالدنيا للي بديت نمشي لين كبرت لين وصلت للعمر هذا ،، تعلمت منك كل شي الباهي و الخايب،، الي اضر والي ينفع الي يصلح والي ما يصلحش،، كل حاجة انا نعرفها في الدنيا هاذي انت وريتهالي،،انت الي نحتلي شخصيتي و كونتهالي،،كنت مش بركا حبيبي وروحي وعمري والكلام الكبير الكل الي كنت نقلك فيه طول حياتي وانت كنت تتمنيك علي وتستغل في حبي الكبير ليك
علي (حب اعنقها بعدتو):مش صحيح وحياتك انت مش صحيح انا نحبك كيف ما انت تحبني ويمكن حتى اكثر،،حس بي علياء اغزرلي في عينيا اغزر لدموعي الهابطة انت تعرف اني ما نبكيش اما ما وصلت بكيت توا كان خاتر مقهور،، مقهور عليك وعلى روحي
علياء (تضحك):علاش مقهور؟؟واصلا شنوا بش يقهرك؟؟كل الي تحبو ومحتاجو مغير حتى ما تطلب ايجيك لحد ايديك،،انا هي الي مفروض نتقهر على روحي ،، لي عمري ما خممت نعطي قلبي لغيرك عمري ما خممت انكون ملك راجل غيرك ولا حد اخمم امس شعرة مني خلفك،، وقت لي انتي عرفت وحبيت وعرست وزدت جبت الصغار زادة (بدات تعيط)
المشكل اني كنت عارفة انك مصوحب ،،انك كل مرة مع وحدة ،،انك تتمنيك على وحدة واثنين وثلاثة ومئة،،كنت نعرف انو كي ما تباتش في الدار تكون مع وحدة ،،كي تتسبب بالخدمة و بالسفر تكون ماشي تعدي الويكاند ولا العطلة معاها
كنت نشم عليك ريحة البرفان متاعها ريحتها تروح وهي لاصقة فيك،،كنت نسكت ونصبر خاتر معنديش الحق نحاسبك ولا نمنعك انقول خليه اكاكا من وحدة لوحدة وانا منيش نشوف فاهم ومنيش نتحرق بالغيرة والشي قدامي خير ملي اعرس ونضطر اني نشوفها معاه كل دقيقة وكل لحظة
حياتي كاملة خايفة منها كاللحظة ،،كنت كل مرة امك ولا امي ايجيبولك عروسة جديدة قلبي اطيح وما اعاود ترجع في الروح كان كي نطمان انك تخلصت منها نفرح ونطير مل الفرحة (تضحك) تصدق اني كنت نظن انك ترفض انك تعرس خاترك تحبني وخاتر متحبش تاخذ حتى مرا خلفي انا رغم اني نعرف انو حكايتي انا وياك مستحيلة
اما انا رغم انك خويا حبيتك،، انا لي قبلت عيشة الحرام مهم نكون معاك وما تبعدش علي ،،انا لي غلطت ،، انا لي نستاهل انا الرخيصه ،، انا لي عمري 19 وعايشه في دوامة،،حبيبي هو خويا وخويا هو معرس وعندو طفل،،حبيبي معايا و مش معايا،،(تضحك في ضحكة متاع تمقعير)قتلي تحب تبدا صفحة جديدة معايا مش هكا؟؟ صفحة متاع شنوا تحب تبداها معايا يا خويا
علي(شدها بالقوي وباسها من شفايفها بكل غل):منيش خوك ،،منيش خوك ولا عمري كنت خوك
افهمها هاذي افههههمها
🔴
علياء خلاتو اكمل يحكي الحكاية الكلها من اول ما كلمتو خالتو لحد ما تاكد وتيقن من قصة امو هي وبوه ،،كانت تسمع فيه ودموعها هابطة وشريط الذكريات الكل مابين عيناها ،،تسمع وساكتة ومصدومة اصلا مهيش عارفة روحها تصدقو ولا تكذبو؟،،تبكي ولا تضحك؟تفرح ولا تحزن؟ تترمى عليه تعنقو ولا تترمى عليه تخنقو؟؟ اتزيد تحبو؟ولا تولي تكرهو؟؟ تتكلم ولا تسكت؟؟اصلا شنوا بش تقول؟؟شنوا بش تحكي؟؟ شنوا بش تجاوبو وشنوا بش ترد عليه؟؟خوها هو ولا مش خوها؟؟ولد خالتها ولا ربيبها؟ حبيبها هو ولا اكبر كذبة في حياتها؟؟ علي هو ولا شخص اخر متعرفوش ولا عمرها عرفتو؟؟ هو علي اما مهوش علي هو الراجل الي حبتو هالسنين هذي الكل ولا واحد اخر غريب اول مرة تكتشفو؟ هي فين؟؟ هو شكون؟؟وهي شكون؟؟معادش تعرف معادش تستوعب معادش تفهم ومعادش تصدق
علي(بعد ما كمل كلامو الكل قربلها وحب اعنقها ما فاق كان بالكف على خدو كفها ما وجعوش على قد ما وجعو سكاتها زاد قربلها خدو الثاني وقاللها):اضرب علياء اضرب (شدلها يدها وكبسلها علاها وحطها فوق وجهو)اضرب وفش غيضك في اضرب كان ضربك لي اريحك واطفيلك نارك وابردلك جواجيك اضرب وسبني وقولي اي حاجة في قلبك ما تسكتش وتزيد علي
علياء (ولات تبكي ودخلت في حالة هسترية)
علي (قربلها وعنقها،،عنقها بالقوي بالقوي وابوس فاها من راسها واقولها وهو دموعو هابطة):امان ما تبكيش راك تقتل في
علياء (تبكي وهي في حضنو):انت الي قتلتني انت،،انت الي ذبحتني ودمرتني،،شعمتلك؟؟ فاش غلطت معاك؟؟فاش ضريتك انا؟؟قولي فاش ضريتك؟؟
علي (اعنق فاها):انت روحي راك،،انت روحي وحبي والنفس متاعي
علياء (تبكي وتضرب فيه على صدرو وهو ازيد اعنق فاها باش ما تبعدش):كنت كل يوم تشوف في معذبة،،كل يوم محروقة كل يوم مشوية،،كل يوم نبكي وانوح عليك،،هابلة عليك،،عاشقة فيك،، جانة بيك،،قاتلني الوحش وقاتلني الفراق،،قاتلتني الغيرة وقاتلتني الحيرة،،قتلني حبك وضيعني،،قتلني عشقك وضبعني،،قتلني دمك البارد ساعات وحضنك الدافي وكلامك المعسول ساعات اخرى،،قعدت معيشني بين الجنة والنار بين النعيم والجحيم بين المتعة و القسوة،، مرة مريحني ومفرحني وهاززني لعالم اخر ومرة شاغلني ومحيرني ومكرهني في عيشتي وفي دنيتي وفي حظي التعيس،،مرة متاكدة من حبك لي ومرة ام ايسا من اني في مخك من اصلو،،مرة انا كل شي ومرة حتى شي ،،مرة اميرة في مملكة عشقك ومرة جارية من جواريك ،،مرة تبيعني ومرة تشريني،،مرة تصوني ومرة تخوني،،اما ما كنتش نتخيل في نهار من النهارات انو خيانتك لي بش توصل للحد هذا،،لدرجة انك تعرس وتجيب الصغار وتغدرني وتخدعني وتخبي علي،،3 سنين،،ثلاثة سنين،،وانت معاها ومعايا في نفس الوقت،،تخدع فاها وتخدع في،، تتمنيك علاها وتتمنيك علي،،تلعب باها وتلعب بي،،لا والمصيبة فاش!!
في انك حتى المبرر الوحيد الي ممكن نلقاهولك ولو انو حتى شي ما ابرر عملتك هو انك عرست باها خاترك متنجمش تعرس بي انا اختك طلع هو زادة كذبة،،حيلة تحيلتو باها علي كلكم،،انت،،خالتي راجل خالتي وحتى امي،،(تبكي بالشهقة)حتى امي معاكم خدعتني وكذبت علي وعذبتني كيفكم
تعرف ،،هي تعرف،،وانا نعرفها انها تعرف ،،تعرف كل شي ،،كل شي،،وتقولي علي خوك،،(تضرب فيه)تقولي انت خويا وانت ماكش خويا،،امك الي هي امي مش امك،،الصدر الي رضعت انا منو انت مقربتلوش وفمك ما تحطش فيه،،كيفاش خويا وانت ماكش خويا؟؟كيفاش تنجمو تكذبو لدرجة هاذي؟؟كيفاش تنجمو تستحلاو وتتمتعو بعذاب طفلة معندها حتى ذنب كان انها حبت؟؟الكلهم حسو بي الكل ،،كان انتما،،حتى ميما الي رباتني والي ماتت بين ايديا كذبت علي كيفكم،،لاخر لحظة في حياتها وهي تقولي علي خوك ومتخليش الشيطان اهزك للحرام ،،على اناهو حرام تحكيو؟؟الحرام هو الي تعملو فيه انتما مش انا،،الشواطن هما انتما برئ منكم الشيطان،،انتما كنتو اخبث منو وانذل منو،،هذا الكل بش ما تاخذنيش؟؟علاش؟؟
علي (باقي معنقها ومسيطر علاها):وحياتك عندي وحياتك لا كنت نعرف
علياء (تضرب فيه على صدرو):تكذب تكذب تكذب تعرف،،تعرف كل شي ،،انت السبب
انت الي قلتلهم اكاكا،،انت الي حرشتهم وخليتهم ميقولوش انك ماكش خويا بش انا منحبكش،،خاترك متحبنيش،،خاترك معينكش بي،،خاترك تحبها هي وتحب تعرس باها وتفرحها معاها هي وتقتلني انا
علي:عمري ما فرحت معاها هي عمري ،،طول عمرك انت الي مالكة قلبي وروحي وكل ما في سوا قبل ما نعرف ولا حتى بعد ما نعرف،،علياء انت تنجم تتهمني بكل شي،،(في الوقت اذاكا مريم دخلت سمعت صوتو محبتش تسكر الباب قعدت متخبية وتتصنت عليه ورا الفردة )انا خاين غشاش غدار منافق ساقط فاسد واطي نذل كذاب اناني قول شتحب قولهم الكل حتى ،،المهم ما تقولش اني منحبكش خاتر والله العظيم والله وحياة (جاء بش اقول ولدي خاتر مستانس يحلف بيه)سكت وبعد قاللها ورحمة ميمتي نحبك كان انت اقسم بالله العلي العظيم نموت ونهبل عليك صدقني يا علياء ،،لمرة بركا صدقني ومتحكمش علي بالغالط ،،حت روحك في بلاصتي،،امك ما تطلعش امك خوالك ما يطلعوش خوالك مماتك عزيزك اقاربك الناس الي حليت علاهم عينيك وتربيت معاهم يطلعو كل ما يربطك باهم شي،،حتى بوك الي كان مثل اعلى بالنسبة ليك،،رمز للرجولية و للحب وللتضحية وللصدق وللاخلاق العالية والمبادئ والقيم واكا اللغة الكل يطلع واحد زاني خاين وغدار انتهازي استغل مرا زوالية جاية تخدم على روحها تلقط في خبزة تصرف على عرش كامل متاع رجال باركين ومطيشين في الديار وهي تشقى وتتعب وتضحي وتتهان وكرامتها تنداس والي يسوىوالي ما يسواش اذلها ويتبولد علاها ويتحرش باها ويوصل حتى يرقد معاها وايجيب منها صغير،،تخيل روحك في بلاصتي وبعد ما عرفت انو امك ولدتك في gراج كراتو بش تخبات فيه بش سترت الفضيحة الي كان سببها سي سليم بابا العزيز والغالي،، تصور روحك بعد ما كتشفت انك السنين هاذي الكل عشتهم وانت في حضن وفي حنية وفي دلال مرا اخرى كنت في بالك انها امك تطلع مرت بوك الي سخفت عليك وما طيشتكش وما رفضتكش وما انتقمتش حتى من بوك الي جابك لاها ولد عام،،تخيل نفسك في بلاصتي كنت تنجم ترد جميل المرا هاذي بانك توجعها؟؟بانك تواجها وتاقف قدامها وتقولها ماكش امي ،،امي مرا اخرى ؟؟حبيبة هي الي ردتني راجل هي الي تحملت مسؤوليتي و استحفظت علي في الوقت الي غيرها كانت تنجم اقل ما يمكن انها اطلق بابا وتبعثني انا وياه،،وحياتك انت عندي انا ما سكت كان على خاترها هي ،،حاول تفهمني حاول تحط روحك في بلاصتي حاول تتخيل الموقف الي تحطيت انا فيه،،تي اسهل حاجة كانت تنجم تكون اني نجي ونخربق الدنيا ونصيح ونعيط ونسب و نضرب ونهد الدنيا على ريوسهم الكل اما انا اخترت الحل الاصعب،،اني سكت هالسنين هاذي اقسى بمليار الف مرة من اني تكلمت ،،جرحي الي كان مخبي في قلبي كان يوجع في وحدي كنت حامل هالحمل الثقيل وحدي
علياء (قصت عليه):علاش ما قتليش باهي؟؟ علاش ما صارحتنيش؟؟علاش ما رتحتنيش؟؟وما فرحتنيش؟؟
علي:effectivement انت اكثر وحدة مكنتش انجم نقوللها ،،خاتر كان قتلك كنت بش نعذبك اكثر مش نفرحك،،كنت بش نعطيك امل زايد وانا نعرف انو عمرو ما بش اوصلنا للشي،،، كنت بش تحلم وبش تتمنى وبش تتامل بالفارغ انا قراري كنت ماخذو انو حد ما بش يعرف بالحقيقة وكان حكيتلك ليك انت اكيد ما كنتش بش تسكت خاتر نعرف قلبك مهوش بش اطاوعك وبش تعمل اي حاجة مهم تشوف حلمك انا نكونو مع بعضنا يتحقق
علياء (قصت عليه):وتوا؟؟ماكش خايف لا نتكلم ونفضح سرك؟؟ علاش توا بالذات تكلمت ؟؟علاش اليوم بالذات حكيتلي على عرسك وعلى قصة بوك وامك؟؟
في الوقت اذاكا مريم خرجت من ورا الباب (علي تصدم كي راها)
مريم:تحب تعرف علاش قالك هذا الكل اليوم؟؟
انا نقلك علاش،،السيد هذا الي قدامك (غزرتلو غزرة متاع احتقار)الي اسمو راجلي
قرر انو يعلن اليوم اليوم الوطني للصراحة
هزني انا وولدو ،،اسامة اكيد راهو حكالك عليه عاد وقرر بعد 3 سنين عشتها معاه في الظلام انو اخرجنا للنور ،،اااا رد بالك مش بارادتو قرو هالقرار انا الي ضغطت عليه واجبرتو بالسيف انو يوقف حد.للمهزلة هاذي واكون راجل مرة بركا في حياتو و اواجه عايلتو بي (تغزرلو)هو جبان راهو خلف انو ساقط واناني،، اخاف اواجه خاتر العمايل الي يعمل فاهم اتحشم وتخجل وتقزز
عزيزتي ماكش كانت انت المظلومة والمسكينة والي تسخف فما ضحية اخرى غيرك دفعت وقاعدة تدفع ومازالت بش تدفع الثمن متاع حبها و عشقها للانسان اناني كيف سي علي ،،فما غيرك كرامتها كانت كل يوم كل لحظة كل ثانية تنداس خاتر تبعت قلبها مش عقلها خاتر ضحات وصبرت وتحملت وعفست على جرحها و داونت عايلتها وخسرت اصحابها واحبابها على خاتر هايمة وعاشقة ومغرومة ومتيمة بيه كان تشوف كان فيه هو في الدنيا،، عيناها ظلام من غيرو ،،منيش بش نحكيلك خاتر الكلام هذا انت اكثر الناس الي عارفتو وحاستو ومليعة بيه
كنت ديما معانا خيالك في وسطنا بدنو معايا وعقلو معاك راقد عندي في حضني وروحو فيك انت(تلفتتلو ليه هو الي كان يتكيف ويرحي مل العصب)قوللها قداش من مرة غلط في اسمي وقتلي علياء!! قولها قداش من مرة تعاركنا على خاترها (رجعت تغزر لعلياء الي كانت قاعدة و ترعش وراسها مطبس معندهاش القوة ولا الشجاعة انها تهزو): تعرف الي انا على قد ما نكرهك على قد ما نسخف عليك ،، وعلى قد ما نبغضك على قد ما نشفق عليك،،، و قد ما نحسدك على حبو ليك على قد ما كنت مرتاحة ومطمانة لانك اختو وانو مهوش بش يمسك كانت هاذي الحاجة الوحيدة الي مبردتلي طرف ناري الي مصبرتني و مهديتني شويا
الف مرة نخمم نجيك ونحكي معاك الف مرة نهز التليفون وبش نطلبك ونقلك ابعدلي على راجلي ،،كنت في كل لحظة نسيطر على روحي وعلى اعصابي (غزرتلو)خاتر نخاف،،نخاف نخسرو ،،نخاف معادش يرجعلي،،نخاف يبعد علي ونتحرم منو على طول،،كنت راضية بكا السويعتين والثلاثة الي اعداهم معايا خير من بلاش،، خير من اني منشفوش بالكل،،خير من اني نتحرم منو ومن ريحتو (قربتلو وحطت راسها على كتفو وشدتلو يدو وقلتلها)انحبو الله غالب،،،نعرف اني رخيصة ومغير كرامة ومغير عزة نفس اما نحبو،،علاش ووقتاش وكيفاش منعرفش،،الي نعرفو حاجة بركا اني نموت عليه رغم الي عشتو معاه ما اينجم اخليني كان حاقدة وناقمة عليه(كانت تحكي ودموعها هابطة بعد سكتت وضحكت ضحكة متاع قهرة)هو مش خايب لكا الدرجة راهو ،،علاش بش نكذب؟؟ كان حنين معايا ساعات لدرجة اني كنت مستعدة نبيع الدنيا الكلها على خاترو،،، (تضحك وتغزرلو )وكان اضحكني زادة،،ويحكيلي حكايات قبل ما نرقد (كبستلو على يدو)ودللني وشيخني وما حرمني من شي،،حاول انو يعطيني كل ما يملك (رجعت حطت راسها فوق كتفو)كان حاجة بركا ما قدرش وماهوش بش يقدر يعطيهالي (حطت يدها على قلبو)خاتر بكل بساطة مهوش ملكو انت الي ماخذتهولو انت الي حرمتني منو وسرقتو مني،،كان ما جيتش انت موجودة انا وياه رانا عايشين احلى عيشة،، راهو انا وولدي مناش مخبين رانا معاه ومع امو وبوه راهو ولدي ما تولدش في السر قول عليه ولد حرام
على فكرة هو توا مع امك وبوك (ضحكت ضحكة متاع تمقعير و غزرتلها)شفت علياء؟؟meme pas سالني عليه وينو ولا فينو؟؟ شفت كي قتلك اناني وحبك انت عاميه للدرجة انو ما خممش حتى يسال على ولدو ،،حبك انت اقوى حتى من حبو لولدو
علي(يحكي وساقو ترعش مل العصب):ماكش انت الي بش تعلمني كيفاش نحب ولدي ok؟؟؟؟
كملت توا؟؟ c bon؟؟ انجم نحكي ماهو
علياء (بصوت مكسور):معندك ما تحكي علي الكلام الي لازم يتقال الكل تقال لهوني وكفاية حتى اعصابي معادش تنجم تزيد تتحمل اكثر من هكا ربي اهنيكم وانا بطبيعتي لازم نخرج منها حياتكم عشقنا مل الاول كان جريمة وكل جريمة تستحق العقاب وانا هاني خذيتو عقابي وبالزايد زادة ،،كان لازمني مل الاول نحط حد للهالمهزلة كيف ما قالت هي اما انا تماديت فاها وهاني بش نخلص توا (جات بش تقوم هبطها من يدها)ترس غادي مفماش قومان
الزوز حكيتو وفرغتو قلوبكم وانا سوى بالنسبة ليك ولا لاها المجرم و المذنب والي كسرتلكم قلوبكم انا ولد الحرام الي لعب بيكم الزوز وانتما الأبرياء الي قاعدين تخلصو وانا نتفرج وشايخ ومرتاح
كان انا غالط انتما الزوز غالطين كيفي وكان اما مذنب انتما الزوز مذنبين كيفي
شد علياء من يدها ودورها ليه:قداه من مرة بعدت عليك قبل؟؟قداه من مرة عاركتك وضربتك حتى بش تنساني ومعادش تخمم في؟؟قداش من كف كليتو ملي كنت فقسة صغيرة وتجيني وتقولي نحبك؟؟(ولى اصيح)تكككلم ،،تكلم كان طاوعتك انا ولا تمنيكت عليك ولا منيتك بحاجة انا منجمش نعطيهالك!! اكثر من هكاكا شنوا كنت انجم نتصرف معاك؟؟ نقتلك مثلا بش اتخرجني من مخك وتنسى هالحب الي عشش في مخك من الصغرة؟؟ نذبحك بش تفهم انو الي قاعدة تحس فيه غالط؟؟ كنت عافس على قلبي ونعامل فيك بالقسوة هذيكا الكل بش تفهم اني منحبكش بش تمحيني من بالك بش ما تتعذبش كيف ما انا قاعد نتعذب،، حبيت نحميك ونحمي مشاعرك حتى على حساب روحي انا ومشاعري انا ،،اما انت كل ما كنت نقسى اكثر قد ما تزيد تحبني اكثر وتزيد تقربلي اكثر للدرجة انك عرضت علي حتى روحك،،انت الي خليتنا نوصلو للحالة هاذي،، انت الي خليتني نوصل نرقد معاك وما تخلنيش نزيد نحكي اكثر من هكا خاتر عيب
عمري ما تمنيكت عليك ولا اجبرتك تعمل حاجة بالسيف عليك،، كنت معاك راجل لاخر لحظة حتى كي رقدت معاك ما ضريتكش في الوقت اني كنت انجم نضرك وماكش بش تتكلم ولا حتى تقولي شبيك عملت اكاكا ولا علاش عملت اكاكا،، حتى كي عرفت بالحقيقة ما قتلكش بش ما تتعذبش اكثر مش كان انا غالط علياء حطها في بالك هاذي حطها في بالك
(دار لمريم)وانت؟؟كذبت عليك في حاجة قبل ما تخذني؟؟خبيت عليك حاجة؟؟ كل شي تعرفو ظاهرلي ،، مل الاول عارفة روحك على شنوا قادمة،،ما اجبرتكش تاخذني بالسيف ظاهرلي،، ولا وافقت في عوضك،،ولا حتى خذيتك في السر كيف ما قاعدة تحكي،،بوك وامك وخوك ظاهرلي بجنبك وانت تصحح في الصداق ،،مخبينا شي علاهم عارفين مل الاول بنتهم على شنوا قادمة بموافقتها ورضاها
اني انا خبيت على عايلتي هذيكا حكاية اخرى وكيف كيف انت راضية باها مل الاول
دونك يزيو الزوز من دور الضحايا الي دمرلهم حياتهم الجلاد
مريم(ضحكت ضحكة متاع تمقعير): صحيح ما غصبتش علي حتى شي انت انا الي بعت روحي ليك على خاتر قلبي اما من اليوم معادش مستعدة نزيد نكمل معاك في هالطريق هذا انظن كل شي تفظ اليوم
بنت خالتك ولا بنت اخت مرت بوك ولا حبيبتك ولا الي تحب تسماها سماها اهيكا قدامك تحب تاخذها تعرس باها اتجيب منها الصغار حاجة تخصك ومعادش تعنيني يزي ما ضحيت معاك يزي ما دست كرامتي،، ماهي طلعت مش اختك واخيرا اعترفت انك تحبها مبروك عليك انشاء الله ربي اهنيك معاها وتنجم تفرحها وتعطيها السعادة الي حرمتني منها انا (تمسح في دموعها)اصلا الكلام هذايا انا قلتو ديجا قبل ما نجي لهنا لامك ولبوك ولامك انت زادة يا علياء (علياء غزرتلها باهتة مفيبلهاش الي امها في بالها اصلا)قلت الي في قلبي والي عندي سنين لازم نقولو،، عندك الحق علي مش كان انت غالط حتى انا غالطة الي قمرت و خليت نفسي نوصل معاك للدرجة هاذي حقني مل الاول ما قبلتش من اول ما عرفتك حقني عفست على قلبي وكليت الكفوف ونسيتك ،، انا غالطة وكل طفلة في الدنيا هاذي تغلط كي تاخذ راجل عايلتو ميعرفوهاش ولا حتى موافقين علاها،، انا الغالطة الي مخرجتش من حياتك من قبل من اول م حسيت وشميت انك تحبها حقني انسحبت من وقتها وسوى كانت اختك بالرضاعة ولا مهيش اختك،، مدام وصلني احساسك باها وعشقك لاها كان علي نبعد ونخرج من حياتك ونحافظ على شويا من كرامتي ،،بش نكذب عليك توا كان نقلك بش ننساك ولا بش ننسى هالجرح الكبير الي في قلبي منك ،،نكذب عليك زادة كان بش نقلك اني معادش نحبك واني بش نفرح كي بش نطلقو وكي بش نشوفك متهني معاها وفارح ،،منافقة كان بش نقلك انا فرحانة مدام انت فرحان وانو سعادتك انت هي سعادتي هذاكا الكل كلام مسلسلات وافلام سعادتك مهيش سعادتي وفرحتك مهيش فرحتي ،،سعادتك هي موتي وفرحتك معاها هي عذابي ووجيعتي الي بش تقعد معايا طول عمري
يمكن الحاجة الوحيدة الي ممكن تصبرني في حياتي هي اسامة،، ولدي الي بش نشم عليه ريحتك وبش نعنقو كل ما نتوحشك و بش نضمو لصدري كل ما نحتاجك ،،منيش بش نعطيهولك ولا تخمم نهار تفكو مني ايكا علياء تو تجيببلك صغار،،تو تملالك الدار ولاد وبنات ،،تو تفرح بوك وامك بيك وتحقلهم امانيهم الي حطمتهالهم انت بعرسك بي
قامت:انا الي عندو قلتو (غزرت لعلياء)رد بالك عليه عاد راني عطيتك قطعة من روحي ،،ماك تحبو وسنين وانت تستنى في هالنهار اوكا من اليوم هو ليك اتمتع بيه وشيخ ييه وتفرهد بيه تهنى واطمان انا مستحيل نرجع لحياتو مرة اخرى
(غزرت لعلي)ولدك توا خليتو بحذا عزيزو وماماتو ،،امك شدت في صحيح حبتو يقعد عندها شويا (ضحكت ضحكة متاع تمقعير)على قليلة الطفل شاف عائلة بوه وهما شافوه انا وعدتهم اني منيش بش نحرمهم منو ونهار الي احبو اشفوه ايجوني ولا انا كان لزم نهزهولهم مش على خاترك راهو،، على خاتر ولدي منحبوش اعيش ويتربى معقد
ولا بش نخليه يحقد عليك ويكرهك كيف ما انت حقدت ونقمت على بوك ووصلت جلطتو قبيلا بكلامك
احمد ربي جات خفيفة وما ماتش مكانش راهو ذنبو قعد في رقبتك طول عمرك وضميرك بقى اانب فيك حياتك كاملة
توا هو في السبيطارتنجم تمشي اطل عليه وتكب على راسو وتطلب السماح مهما كان هو بوك وما تنساش انو الي عملو هو فيك انت زادة قاعد تعاود تعمل فيه مع ولدك بطريقة اخرى اما النتيجة والثنية هي نفسها وتو الزمان يثبتلك يا علي
هبط كلامها كالصاعقة على راسو صدمو ورهوجو وضربو في الصميم ما فاق بروحو كان كي هز مفاتحو وخرج علياء وخرج
الحاصل مغير ما نطول عليكم وصلو للسبيطار وغادي لقى علي امو وبوه وعايدة الي فاحو فيه مل الاول وعطاوه على راسو هو وياها لاموهم وعاتبوهم و سمعوهم وسخ وذناهم اما في اللخر رضاو علاهم وتقبلو حبهم وقبلو بيه
مل الاخر كان اقسى نهار في حياتهم الزوز وفي نفس الوقت اسعد نهار
النهار الي تحول عشق علي وعلياء من جريمة يتسترو علاها واخبيو فاها على عينين الي يعرفوهم والي ما يعرفوهمش لواقع يلزم ناس الكل تعرف بيه و تسمع عليه وتحكي بيه وعليه